Mokā ‘Feagai Mai Te ʼu Matagi Kia Tatou’

ʼI tana fakamatala te meʼa ʼaē neʼe hoko ki te kau tisipulo ʼa Sesu, ʼi tanatou faiga ʼaē ke nātou fakalaka ʼaki te vaka ʼi te Tai ʼo Kalilea, ʼe ʼui e Maleko ʼi tana Evaselio, neʼe nātou “kinakina i tanatou tauaʼalo, koteuhi nee fehagai kia natou te matagi.” Neʼe nofo Sesu ʼi te matatai, pea neʼe sio ki tanatou kinakina pea neʼe haʼele faka milakulo ʼi te tai ke fakaaʼu kia nātou. ʼI tana kake ake ki te vaka kia nātou pea neʼe puli ai mo te matagi.​—Maleko 6:​48-​51.

Neʼe toe fakamatala e Maleko, ki muʼa atu, neʼe “hokosia mo he afa lahi.” Ko Sesu “nee ina pupulai te matagi . . . , nee puli te matagi pea nee to ai mo he totofu lahi.”​—Maleko 4:​37-​39.

Logope la ʼe mole tou maʼu ʼi te temi nei te pilivilesio ʼaē ke tou sio ki he ʼu milakulo feiā, kae ʼe lahi te ʼu meʼa ʼe feala ke tou tāʼofi ai. ʼI totatou maʼuli ʼi te ʼu temi faka tuʼutāmaki ʼaenī, ʼe mole tou hāo mai te ʼu matagi ʼaē ʼe nātou fakatātā te ʼu faigataʼaʼia. (2 Timoteo 3:​1-5) Ei, ʼi ʼihi temi ʼe tou manatu ai ka tou lotohoha pea mo tou tau mo he ʼu faigataʼaʼia, pea ʼe ʼāsili ai totatou ʼu fihifihia ʼaē ʼe fakatātā e he tuʼani matagi. Kae ʼe ʼi ai totatou hāofakiʼaga! ʼE fai e Sesu te fakaafe ʼaenī: “Ke omai kia te au, ia natou fuape e mamahi pea mo natou e mafasia i te fua kavega, pea e au fakafimalieʼi anai koutou.”​—Mateo 11⁠:⁠28.

Mokā hage ʼe ‘feagai mai te ʼu matagi kia tatou,’ pea ʼe feala ke “totofu lahi” totatou loto. ʼO feafeaʼi? ʼAki tatatou falala ki te ʼu fakapapau ʼaē ka fakahoko moʼoni anai e Sehova ʼAtua.​—Vakaʼi ia Isaia 55:​9-​11; Filipe 4:​5-7.