Te Tagata—ʼE Ko He Manu Koa Kua Poto?
“ ʼE maʼuhiga koa te ʼu meʼa ʼaē ʼe tou tui kiai ʼo ʼuhiga mo te tupuʼaga ʼo te maʼuli?”
Neʼe lagaʼi te fehuʼi ʼaia e te taʼahine ʼo Pelesile ʼe taʼu 16, ʼi te ʼu ʼuluaki palalau ʼo tana akonaki ʼaē ko tona kupu tāfito “Te Tagata—ʼE Ko He Manu Koa Kua Poto?” Neʼe fakaafe e te fafine faiako te taʼahine ʼaia ke ina fakamahino te fehuʼi ʼaia ki tana kalasi, ʼi tana ʼosi maʼu te Réveillez-vous ! ʼo te ʼaho 22 ʼo Sūnio 1998, ʼaē ʼe talanoa ki te faʼahi ʼaia.
Neʼe faka maʼuhigaʼi e te taʼahine Fakamoʼoni ʼaia te ʼu fua kovi ʼo te akonaki ʼo te evolisio ʼaē ʼe ina ʼui ʼe hāo pe te ʼu meʼa maʼuli ʼaē ʼe mālolohi. Ohage la, ʼaki te akonaki ʼo te evolisio, ko te tokolahi ʼe nātou manatu, ko te tau ʼe mole kovi ia, heʼe kau ki te faigaʼi tuʼumaʼu ʼa te hahaʼi ke nātou maʼuʼuli, pea neʼe tupu ai te Fascisme pea mo te Puleʼaga Nasi.
Neʼe fakamahino e te taʼahine ako ʼaia, ʼe kehekehe ʼaupito te hahaʼi pea mo te ʼu manu. Neʼe ina ʼui fēnei: “Ko te tagata tokotahi pe ʼaē ʼe holi ki te ʼu meʼa fakalaumālie. ʼE ko te tagata tokotahi pe ʼaē ʼe ina fia ʼiloʼi te ʼuhiga ʼo te maʼuli pea mo tona fakatuʼutuʼu. Ko te tagata tokotahi pe ʼe mataku ʼi te mate, ʼe ina fia ʼiloʼi tona haʼuʼaga, pea ʼe fia maʼuli ʼo heʼegata. ʼE maʼuhiga ʼaupito ke tou fakaʼaogaʼi he kiʼi temi moʼo kumikumi totatou haʼuʼaga!”
Neʼe vikiʼi e te fafine faiako te ʼu fakamahino lelei ʼaia. Neʼe ina ʼui, neʼe fai e te taʼahine Fakamoʼoni te akonaki lelei, heʼe ina leleiʼia te lautohi. ʼE ʼiloʼi ʼi te faleako, ʼe ko he taʼahine ʼe ina lau tuʼumaʼu te ʼu tohi faka Tohi-Tapu ohage ko te Réveillez-vous ! pea mo Te Tule Leʼo.
Ko te kau Fakamoʼoni ʼa Sehova, ʼe nātou tuʼania ki te lave kovi ʼo te akonaki ʼo te evolisio ki te loto pea mo te ʼatamai ʼo te kau tūpulaga. Koia la ʼaē, ʼi te kokelekasio ʼo te taʼahine ʼaia neʼe ʼekenaki ai te kau tūpulaga Fakamoʼoni ke nātou tufa te Réveillez-vous ! ʼo te ʼaho 22 ʼo Sūnio, 1998, ki tonatou ʼu faiako pea mo tonatou ʼu kaugā ako. Neʼe tufa ia nusipepa e 230 ʼi te ʼu faleako kehekehe ʼo te kolo. Ko te pule ʼo te Selevisi ʼo te Science ʼi te tahi faleako, kua apone ki te Réveillez-vous !
Ei, ʼe maʼuhiga te ʼu meʼa ʼaē ʼe tou tui kiai ʼo ʼuhiga mo te tupuʼaga ʼo te maʼuli! Neʼe fakahā e te tūpulaga ʼaia pea mo tana ʼu kaumeʼa, ko tanatou tui ki te Tupuʼaga ʼe maʼuhiga ki tonatou maʼuli.