Tou Foaki Te Meʼa ʼAē ʼe Maʼuhiga Ia Mata ʼo Sehova

Ko te tohi ʼaenī neʼe momoli ki te filiale ʼa te kau Fakamoʼoni ʼa Sehova ʼo Mozambique:

“ ʼE ʼau taʼu fitu. ʼE kei ʼau ako ʼi te faleako ʼo te tamaliki liliki. ʼE ʼau momoli atu te falā ʼaenī neʼe ʼau maʼu ʼi taku taupau te ʼuhiʼi moa. Neʼe ʼau fakatau leva ki te 12 000 Meticais [ko te 100]. ʼE ʼau fakafetaʼi kia Sehova ʼi tana fai te ʼuluaki ʼuhiʼi moa ʼaē neʼe ʼau taupau ke liliu ko he moa mātuʼa. ʼE ʼau loto ke fakaʼaogaʼi toku meʼa ʼofa ʼaia ki te gāue ʼo te Puleʼaga ʼo Sehova.

“Ko taku tāmai neʼe tokoni mai ki te fai ʼo te tohi ʼaenī.”

Ko ʼihi ʼe nātou ʼui ko te loto fia foaki ʼe faka ʼuhiga ki te hahaʼi ʼaē ʼe lahi tonatou ʼu koloā. Kae ka tou lau te hisitolia ʼo te finetaka masiva ʼaē neʼe ina tuku ki te tānakiʼaga koloā “te ʼu kiʼi foʼi piesi e lua ʼe mole faʼa maʼuhiga,” ʼe mahino mai kia tatou, ko te loto fia foaki ʼe mole hā ʼi te lahi ʼo te meʼa ʼofa kae ʼi te lotolelei ʼe ina uga kita ke kita foaki.​—⁠Luka 21⁠:​1-4, MN.

Ko Sehova ʼe ina leleiʼia te ʼu meʼa ʼofa fuli ʼaē ʼe fai ʼaki te ʼofa, tatau aipe peʼe lahi peʼe veliveli. Pea ʼe ina tapuakinaʼi lahi ia nātou ʼaē ʼe nātou faʼifaʼitaki tona loto fia foaki, ʼo nātou foaki tonatou temi, tonatou mālohi, peʼe ko tonatou ʼu koloā maʼa tona Puleʼaga.​—⁠Mateo 6⁠:33; Hepeleo 6⁠:10.