“ ʼE ʼAu Fia Haʼele ʼo Takafoliʼi Tou ʼAletale, Ê Sehova”

“ ʼE ʼAU fanofano anai toku ʼu nima ʼi te meʼa ʼaē ʼe mole hala, pea ʼe ʼau fia haʼele ʼo takafoliʼi tou ʼaletale, Ê Sehova.” (Pesalemo 26⁠:⁠6) ʼAki te ʼu kupuʼi palalau ʼaia, neʼe fia fakahā e te Hau ʼāfea ko Tavite tana tauhi ʼāteaina kia Sehova. Kae he koʼe neʼe fia “haʼele ʼo takafoliʼi” te ʼaletale ʼo Sehova, pea koteā tona faka ʼuhiga?

Kia Tavite, ko te faʼahi tāfito ʼo te tauhi kia Sehova neʼe ko te tapenakulo pea mo tona ʼaletale kapa ʼo te ʼu sakilifisio, ʼaē neʼe tuʼu lolotoga tona temi hau ʼi Kipeone, ʼi te potu noleto ʼo Selusalemi. (1 Hau 3⁠:⁠4) Ko te ʼaletale ʼaia neʼe veliveli age ʼi te ʼaletale taulekaleka ʼaē ka fakatuʼu anai ʼi te malaʼe ʼo te fale lotu ʼo Salomone, he neʼe meta lua pe tona loa pea mo tona laulahi.a Kae neʼe fiafia lahi ia Tavite ʼi te tapenakulo pea mo tona ʼaletale, ʼaē neʼe ko te potu tāfito ʼaē neʼe fai ai te tauhi maʼa ʼi Iselaele.​—⁠Pesalemo 26⁠:⁠8.

Neʼe fai fuli te ʼu holokoseta, mo te ʼu sakilifisio pea mo te ʼu mōlaga ʼi te ʼaletale, pea ʼi te taʼu fuli lolotoga te ʼAho ʼo te ʼu Faifakalelei neʼe momoli tāfito ai te ʼu sakilifisio maʼa te kau Iselaele. ʼE ʼi ai te ʼuhiga ʼo te ʼaletale pea mo tana ʼu sakilifisio ki te kau Kilisitiano ʼo te temi ʼaenī. ʼE fakamahino mai e te ʼapositolo ko Paulo, ko te ʼaletale ʼe ina fakatātā te finegalo ʼa te ʼAtua, ʼaē neʼe Ina tali ai he sakilifisio ʼe tau mo feʼauga moʼo totogi ʼaki te malamanei. Neʼe ʼui fēnei e Paulo: “ ʼAki te ‘finegalo’ ʼaia neʼe fakamaʼa ai tatou ʼaki te mōlaga ʼo te sino ʼo Sesu Kilisito ʼo tuʼa tahi ʼo talu ai.”​—⁠Hepeleo 10:​5-​10, MN.

ʼI muʼa ʼo tanatou fakahoko tanatou gāue ʼi te ʼaletale, ʼe fanofano tuʼumaʼu te ʼu pelepitelo tonatou ʼu nima moʼo fakamaʼa ʼo nātou. Koia ʼe tonu ai te ʼui ʼa te Hau ko Tavite, neʼe ina fanofano tona ʼu nima “ ʼi te meʼa ʼaē ʼe mole hala” ʼi muʼa ʼo hana ‘haʼele ʼo takafoliʼi te ʼaletale.’ Pea neʼe ina fai “ ʼaki te agatonu ʼo te loto pea mo te faitotonu.” (1 Hau 9⁠:⁠4) Kae kapau la, neʼe mole ina fanofano tona ʼu nima, pea ʼe mole tali anai tana tauhi​—⁠tana ‘haʼele ʼo takafoliʼi te ʼaletale.’ ʼE moʼoni, ko Tavite neʼe mole ko he Levite pea neʼe mole ina maʼu te pilivilesio ʼaē ke ina fakahoko te gāue faka pelepitelo ʼi te ʼaletale. Logope la tona ʼuhiga hau, kae neʼe tapu tana hū ki te malaʼe ʼo te tapenakulo. Pea ʼi tona ʼuhiga Iselaele agatonu, neʼe fakalogo ki te Lao Faka Moisese pea neʼe ina ʼave tuʼumaʼu tana ʼu meʼa ʼofa ke momoli ʼi te ʼaletale. Ko tana haʼele ʼo takafoliʼi te ʼaletale, ko tona faka ʼuhiga neʼe ina fakatafito tona maʼuli ki te tauhi maʼa.

Ia ʼaho nei ʼe feala koa ke tou muliʼi te faʼifaʼitaki ʼa Tavite? Ei. ʼE toe feala mo tatou ke tou fanofano totatou ʼu nima ʼi te meʼa ʼaē ʼe mole hala, pea mo tou haʼele ʼo takafoliʼi te ʼaletale ʼo te ʼAtua, mo kapau ʼe tou tui ki te sakilifisio ʼa Sesu pea ʼaki ‘he ʼu nima pea mo he loto maʼa,’ ke tou tauhi kia Sehova ʼaki he loto katoa.​—⁠Pesalemo 24⁠:⁠4.

[Nota ʼi te lalo pasina]

[Paki ʼo te pasina 23]

Ko te ʼaletale neʼe ina fakatātā te finegalo ʼa Sehova, ʼaē neʼe ina tali ai te sakilifisio ʼe tau mo feʼauga moʼo totogi ʼaki te malamanei