Tou Nofo Agatonu Kia Sehova

KO TE agatonu, ʼaē kua tahitahiga tona maʼu ʼi te temi nei, ʼe ko he kalitate ʼe maʼuliʼi e te kau kaugana ʼa te ʼAtua moʼoni, ko Sehova. Ko he tahi ʼe agatonu, ʼe ko he tahi ʼe ina kātakiʼi te ʼu ʼahiʼahi pea mo nofo mālohi ʼi te fakalaka ʼo te temi. Tou vakavakaʼi te faʼifaʼitaki ʼo te Hau agalelei ko Esekiasi. ʼE ʼui e te Tohi-Tapu: “ ʼI tona ʼosi mate, neʼe mole ʼi ai he hau ʼi te ʼu hau fuli ʼo Suta neʼe tatau mo ia, ʼo feiā mo nātou ʼaē neʼe muʼa ia te ia.” Koteā ʼaē neʼe makehe ai ia Esekiasi? “Neʼe pipiki maʼu kia Sehova,” logope la tana nofo ʼi te lotolotoiga ʼo te hahaʼi neʼe tauhi ki te ʼatua loi ko Moleke. Ei, ko Esekiasi “neʼe mole maliu kehe mai [ia Sehova], kae neʼe ina haga taupau aipe tana ʼu fakatotonu.”​—⁠2 Hau 18⁠:​1-6.

Neʼe toe nofo agatonu mo te ʼapositolo ko Paulo kia Sehova. Ko te fakamatala ʼo tona minisitelio ʼaē ʼe tou maʼu ʼi te Tauhi Foʼou, ʼe ina fakamoʼoni mai ki te nofo agatonu ʼa Paulo ʼi tana tauhi ki te ʼAtua ʼaki tona nefesi katoa. ʼI te ʼu lakaga fakaʼosi ʼo tona maʼuli fakakelekele, neʼe ina ʼui fēnei ʼo ʼuhiga mo ia: “Neʼe ʼau tau ʼi te tau matalelei, kua ʼau fakaʼosi te lele, neʼe ʼau tauhi te tui.”​—⁠2 Timoteo 4⁠:​7, MN.

Ko Esekiasi pea mo Paulo ʼe ko he ʼu faʼifaʼitaki lelei, he neʼe nā nonofo agatonu! Tou faiga ke tou faʼifaʼitakiʼi tanā tui, ʼo tou nofo agatonu ki totatou ʼAtua Lahi, ko Sehova.​—⁠Hepeleo 13⁠:⁠7.