Ko Ai Ka Ina Fakagata Anai Te Agamālohi?
ʼI Sepetepeli 1999, ko Kofi Annan, te Sikalaipe Lahi ʼo te Kautahi ʼo te ʼu Puleʼaga Fakatahi, neʼe fakaʼalofa ki te ʼu fakafofoga ʼo te ʼu puleʼaga ʼaē neʼe ʼōmai ki te 54 fakatahi ʼaē ʼe fai e te Fono Lahi ʼi te taʼu fuli. Neʼe talanoa te sulunale The Toronto Star, ki te ʼu palalau ʼaē neʼe ina fai ki te ʼu takitaki ʼo te malamanei katoa, ʼo ina ʼui fēnei: “ ʼE lahi te ʼu fenua ʼe mole nātou loto ke gata ʼaki pe te ʼu palalau fakaʼofaʼofa ʼaē ʼe fai e te kautahi faka malamanei. ʼE nātou loto ki he fakapapau moʼoni pea mo ʼaoga ke feala ai hanatou fakagata tonatou ʼu fihifihia ʼo ʼuhiga mo te agamālohi, pea mo nātou tokoni age ke nātou fakaaʼu ki he maʼuli fīmālie.”
ʼE feala koa ki te Kautahi ʼaia pea mo te ʼu puleʼaga ʼaē ʼe lagolago kiai ke nātou fai he “fakapapau moʼoni pea mo ʼaoga” moʼo fakagata te agamālohi? ʼI te talanoa pe ʼaia ʼo te sulunale Star, neʼe ʼui fēnei ai e te Pelesita Amelika ko Bill Clinton: “ ʼI te sēkulō ʼaenī ʼaē neʼe lahi ai te ligi toto, ʼe tou ʼiloʼi ʼe faigafua te ʼui ʼaē ‘ ʼe mole toe hoko anai he meʼa feiā,’ kae ʼe tou ʼiloʼi ʼe faigataʼa tona fakahoko.” Neʼe ina toe ʼui fēnei: “Ko te fai ʼa he ʼu tuʼuga fakapapau, ʼe kovi age ʼi he mole fakahoko ʼo he ʼu kiʼi fakapapau liliki.”
Ia taʼu ʼe 2 500 ki muʼa atu, neʼe ʼui fēnei e te polofeta ko Selemia ʼo ʼuhiga mo te ʼu faiga ʼa te tagata: “ ʼE ʼau ʼiloʼi pe, Ê Sehova, ko te tagata kelekele ʼe mole ʼa ia tona ala. ʼE mole ʼa te tagata ʼaē ʼe haʼele te takitaki ʼo tana haʼele.” (Selemia 10:23) Kapau koia ʼaia, pea ʼe ʼi ai koa he ʼamanaki moʼo fakagata ʼo te agamālohi?
ʼE tou lau fēnei ia Isaia 60:18, te fakapapau neʼe fai mai e te ʼAtua: “ ʼE mole tou toe logo anai ki he agamālohi ʼi tou fenua, ki he kaihaʼa peʼe ki he maumau ʼi tou ʼu loto tuʼakoi.” Neʼe ʼi ai te ʼuluaki fakahoko ʼo te lea faka polofeta ʼaia ʼi te temi ʼaē neʼe taki mai ai e te ʼAtua tana hahaʼi ʼaē neʼe nofo popūla ʼi Papiloni ke nātou toe liliu ki tonatou fenua. Kae ʼe tou sio anai ki hona fakahoko ʼe lahi age. Ko Sehova ʼAtua ʼe mole ina “fai he ʼu tuʼuga fakapapau.” Kae ʼi tona ʼuhiga Māʼoluga pea mo Tupuʼaga ʼo te malamanei, ʼe tau mo ia ke ina fakagata te “agamālohi.” Ko te tokalelei ʼe mālo anai ʼi te kele, ʼaki te takitaki ʼo te Puleʼaga ʼa te ʼAtua. Ko te agamālohi ʼe pulihi anai ʼo talu ai!—Taniela 2:44.