Ko Te ʼu Gāue Lelei ʼe Nātou Faka Kolōlia Ki Te ʼAtua
KO NĀTOU fuli ʼaē ʼe nātou ʼoʼofa ki te ʼAtua, ʼe nātou faiga ke nātou fakahā te mālama fakalaumālie ʼaē ʼe haʼu mai tana Folafola, ia te Tohi-Tapu. ʼI tanatou fai te faʼahi ʼaia, ʼe nātou mulimuli ki te fakatotonu ʼa Sesu: “Ke toe feiā pe te mū ʼo tokotou mālama ʼi muʼa ʼo te hahaʼi, koteʼuhi ke nātou mamata ki ʼakotou gāue lelei pea nātou faka kolōlia ai ki takotou Tāmai ʼaē ʼe ʼi selo.” (Mateo 5:16, MN ) Ko he palalau pe ko he aga ʼe lelei, ʼe feala ke ina faka kolōliaʼi te ʼAtua.
Ko te kau Fakamoʼoni ʼa Sehova ʼe nātou faiga ke nātou fakafiafia te ʼAtua, ʼo nātou mulimuli ki te Tohi-Tapu pea mo nātou faiga ke nātou tokoni ki te hahaʼi ʼi te faʼahi fakalaumālie. ʼE nātou fai te faʼahi ʼaia, māʼiape la ʼi te ʼu fenua ʼaē ʼe tapuʼi ai tanatou gāue fai faka mafola. ʼI te tahi kolo tāfito ʼo te ʼu fenua ʼaia, neʼe fai ai e te kau Fakamoʼoni ʼa Sehova tanatou fakatahi lahi, pea neʼe kau kiai te toko ono afe hahaʼi ʼo aʼu ki te hiva afe. Moʼo fai te ʼu fakatahi ʼaia, neʼe nātou lue te fale neʼe fai ai te ʼu faigaoʼi pea mo te ʼu fakahāhā meʼa. Ohage ko tona fai ʼi te ʼu taʼu kua hili, ʼi muʼa ʼo te fai ʼo te fakatahi ʼaia ʼo te taʼu 1999, ko te ʼu tēhina ʼe toko teau tupu, neʼe nātou gāue kinakina moʼo fakamaʼa ʼo te fale, pea mo fakatokatoka ʼo te ʼu meʼa ʼo te fakatagi pea mo te ʼu mikolo, pea mo ʼai fakaʼatu te ʼu lauʼi afe hekaʼaga.
Pea neʼe tokagaʼi e te hahaʼi tanatou teuteuʼi te fale ʼaia. Ko te hahaʼi ʼaē ʼa nātou te fale ʼaia, neʼe nātou sioʼi te ʼu gāue ʼaia neʼe fai. Ko te tahi meʼa ʼaē neʼe nātou sio kiai, logope la neʼe toko 15 666 te kau Fakamoʼoni ʼaē neʼe kau ki te fakatahi ʼaia, kae neʼe tokalelei ia meʼa fuli pea mo nātou logo tahi. Pea neʼe toe punamaʼuli te kau takitaki ʼo te fale ʼaia ki te fakamaʼa lelei ʼaē neʼe fai ʼi te fakaʼosi ʼo te fakatahi.
Ko te kau takitaki ʼo te fale neʼe nātou fakahā tanatou fakafetaʼi ki te ʼu faʼahi ʼaia, ʼo nātou ʼai ke muʼa te kau Fakamoʼoni ʼa Sehova ʼi te lisi ʼaē ʼo te hahaʼi ʼaē ʼe feala ke nātou lue te fale ki te taʼu ʼaenī ka haʼu. Kae neʼe mole gata ai. ʼI te ʼaho 15 ʼo Sūlio 1999, neʼe nātou foaki te fakapale ki te Komite ʼo te fakatahi. Neʼe ko te maka neʼe tohi ai te ʼu kupu ʼaenī “te kokelekasio ʼa te kau Fakamoʼoni ʼa Sehova”—kae neʼe ko he meʼa neʼe mole nātou ʼamanaki kiai ʼi he fenua ʼe tapuʼi ai tanatou gāue fai faka mafola.
ʼI te malamanei katoa lolotoga te taʼu 2000 ki te taʼu 2001, ko te toko lauʼi miliona hahaʼi ʼe nātou fakatahi anai ki te ʼu lauʼi teau Fakatahi Faka Tisitilike ʼa te kau Fakamoʼoni ʼa Sehova “Tou Maʼuliʼi Te Folafola ʼa Te ʼAtua.” Kapau ʼe koutou kau kiai, pea ʼe feala anai hakotou sio tonu peʼe faka kolōliaʼi feafeaʼi te ʼAtua e te ʼu gāue ʼaē ʼe fakahoko e te hahaʼi ʼaē ʼe nātou maʼuliʼi fakamalotoloto te ʼu meʼa ʼaē ʼe ʼui e te Tohi-Tapu.