Te Ako Mai Te Tagata Folau Vaka
ʼE FEALA ke faigataʼa ʼaupito ki he tahi ʼe folau vaka tokotahi ʼi te moana. Ka gaʼegaʼe ʼaupito te tagata ʼo te vaka, pea ʼe feala ke tuʼutāmaki ai, heʼe feala ke faihala ai pea mo kovi te ʼu tonu ʼaē ka ina fai. Koia ʼaē ʼe ina ʼiloʼi ai te maʼuhiga ʼo te taula ʼo te vaka. ʼE ʼaoga te taula ʼaia ki te tagata folau vaka ʼaē kua gaʼegaʼe, ke ʼai hana kiʼi mālōlō, pea ke mole tafea tona vaka. Tahi ʼaē meʼa, ko te taula ʼaia ʼe ina fakahaga te taumuʼa ʼo te vaka ki te matagi pea mo te peau, pea ʼe ina tāʼofi lelei te vaka.
Ko te ʼu tagata folau vaka ʼe lava hoko kia nātou te ʼu tuʼutāmaki kehekehe ʼi te moana, ʼo toe feiā pe, ko te kau Kilisitiano ʼe fai tuʼumaʼu kia nātou te ʼu fakaneke ʼo te malamanei, pea ʼe nātou fia mālōlō. Ei, ʼi te tahi lakaga, neʼe ʼui fēnei e Sesu ki tana ʼu tisipulo: “Koutou fakamamao mai ki he faahi lavaki, pea [ai hakotou] kii malolo.” (Maleko 6:31) ʼI te temi nei, ko te tokolahi ʼe nātou toʼo he ʼu kiʼi vāhaʼa moʼo folau, peʼe ko he ʼu fakaʼosi vāhaʼa ke nātou mālōlō mo tonatou famili. ʼE ko he ʼu lakaga ʼe feala ke tou fīmālie pea mo mālohi ai. Kae e feafeaʼi hatatou ʼiloʼi papau ʼi te ʼu lakaga ʼaia, peʼe tou hāo ʼi te faʼahi fakalaumālie? Koteā te taula fakalaumālie ʼaē ʼe feala ke tou fakaʼaogaʼi moʼo tokoni kia tatou ke tou tuʼu maʼu, pea ke ʼaua naʼa tou tafea?
Ko Sehova ʼe ina foaki lahi mai te meʼa kai ʼaē ʼe ʼaoga kia tatou. Ohage la ko tana Folafola Maʼoniʼoni, te Tohi-Tapu. Kapau ʼe tou lau te Tohi-Tapu ʼi te ʼaho fuli, pea ʼe feala anai hatatou nonofo tuʼumaʼu mo Sehova pea ʼe mole feala anai hatatou fakamamaʼo mai ia te ia. Ko tana ʼu tokoni ʼe ina puipui tatou, pea mo ina faka fealagia kia tatou ke tou tekeʼi te ʼu fakahala ʼa Satana pea mo tana mālama. Kapau ʼe tou lau tuʼumaʼu te Tohi-Tapu, tatau aipe pe ko he meʼa ʼe mole tou māhani kiai, kae ʼe feala ke hage maʼa tatou ko he taula ʼi te faʼahi fakalaumālie.—Sosue 1:7, 8; Kolose 2:7.
ʼE fakamanatuʼi mai e te tagata fai Pesalemo, ʼe “manuʼia te tagata ʼaē . . . ko tona fiafia ʼe ʼi te lao ʼa Sehova pea ʼi tana lao ʼe ina lau leʼo veliveli ʼi te ʼaho mo te po.” (Pesalemo 1:1, 2) Ko te lau ʼo te folafola ʼa te ʼAtua ʼi te ʼaho fuli, ʼe ina foaki mai anai te ‘fiafia’ ʼaē ko te fīmālie pea mo te lotomālohi moʼoni, pea ʼe ina teuteuʼi anai tatou ke tou hoko atu tatatou lele faka Kilisitiano.