“Ko He Faʼifaʼitakiʼaga ʼo Te Logo Tahi”

NEʼE ko te kupu tāfito ʼaia ʼo te alatike ʼi te sulunale ʼi Indaiatuba, ʼi São Paulo, ʼi Pelesile. Neʼe ko ai te faʼifaʼitakiʼaga ʼaia? Neʼe fakamahino fēnei e te tagata ʼaē neʼe ina tohi te alatike: “Ko te kau Fakamoʼoni ʼa Sehova, ʼaē ʼe nātou fakatuʼutuʼu ke nātou laga he ‘Fale ʼo te Puleʼaga’ foʼou, ko te higoa ʼaia ʼo tanatou ʼu fale lotu peʼe ko tanatou ʼu fale fakatahi lalahi, pea neʼe nātou foaki he faʼifaʼitaki lelei pea mo moʼoni ʼo ʼuhiga mo te felagolagoʼaki, pea neʼe tokagaʼi e te hahaʼi ia te faʼahi ʼaia.”

Ko te logo tahi ʼa te kau Fakamoʼoni ʼa Sehova ʼe hā lelei ʼi te ʼu lakaga ʼaia. Koia, neʼe fakahā lelei fēnei e te alatike: “ ʼE malave ki te loto tatatou sio ʼaē ki he ʼu hahaʼi tagata, mo fafine, pea mo he kau tūpulaga ʼe nātou lotolelei ke nātou gāue fakatahi moʼo laga te fale ʼaē ʼe nātou fakatahitahi ai moʼo tauhi ki te ʼAtua.”

ʼE tuku e te kau Fakamoʼoni ʼa Sehova he faʼifaʼitaki lelei ʼi te tahi ʼu faʼahi. ʼE toe ʼui fēnei e te alatike: “ ʼO hilifaki ki tanatou ako pea mo tanatou faikole, ʼe nātou fakatuʼutuʼu ke nātou fetogi te maʼuli ʼa te hahaʼi ʼinu kava pea mo toloke pea mo fakahā ki te hahaʼi te ala ʼo te logo tahi pea mo te ʼofa.” ʼE nātou fakahoko feafeaʼi ia te faʼahi ʼaia? ʼE ʼiloʼi e te kau Fakamoʼoni ʼa Sehova ko te ako pea mo te maʼuliʼi ʼo te ʼu tokoni ʼa te Tohi-Tapu ʼe tokoni ai ki he tahi ke ina līaki tana ʼu aga ʼaē ʼe kovi. Ko te tupuʼaga la ʼaia ʼo tanatou faiga ke nātou ako ki te hahaʼi te ʼu meʼa ʼaē neʼe nātou ako ʼi te Tohi-Tapu. Moʼo fakaʼosi, ʼe ʼui e te alatike ʼaia, ko te ʼu hahaʼi ʼaia ʼe ko “he faʼifaʼitakiʼaga, pea ʼe tonu ʼaupito ke tou mulimuli kia nātou.”

ʼE ava te ʼu fono ʼa te kau Fakamoʼoni ʼa Sehova ki te hahaʼi fuli pe, pea ʼe mole fai ai he tae falā. ʼE mātou fakaafe atu koutou ke koutou ʼolo ʼo ʼaʼahi te Fale ʼo te Puleʼaga ʼaē ʼe tuʼu ōvi atu kiō koutou.