Te Tokalelei—ʼO Feafeaʼi?
ʼE ʼI AI koa he tokalelei faka malamanei ʼe tou ʼamanaki kiai? ʼI te tahi temi neʼe tokolahi te hahaʼi ʼaē neʼe nātou maʼu te ʼamanaki ʼaia, kae ʼi te temi nei kua nātou lotolotolua. ʼO ʼuhiga mo te fakamatala neʼe fai ki te ʼu fakatuʼutuʼu ʼaē ki totatou ka haʼu, neʼe tā ʼi te sulunale Daily Mail & Guardian ʼi te Potu Saute ʼo Afelika, ʼe ʼui fēnei: “Kua hili nei kiai taʼu e 10, neʼe fai te ʼu fakakikite ʼo ʼuhiga mo he tuʼu foʼou faka politike ʼi te malamanei katoa, kae kua hage ia ʼe mole kei falala he tahi ʼi te temi ʼaenī ki te fakatuʼutuʼu ʼaia.”
Neʼe fakahā e te ʼu hahaʼi faitohi ʼaia te falala ʼa te hahaʼi ʼaē neʼe mālohi ʼi te ʼu taʼu pe ʼaenī e hogofulu kua hili. Neʼe ko te hoki ʼosi atu ʼaē ʼo te Tau Momoko, pea neʼe mole kei ʼi ai te fefihiʼaki ʼo ʼuhiga mo te mālohi. Ko te meʼa ʼaē neʼe hage ko he kamataʼaga ʼo he maʼuli foʼou, tokolahi neʼe nātou fakaʼamu ko te malamanei ʼe tuputupu anai ʼo feala ai hana fakatokatoka te masiva, te mahaki pea mo te ʼu ʼaluʼaga ʼo totatou maʼuli. ʼE ʼui fēnei e te fakamatala: “Ko te ʼu fakatuʼutuʼu ʼaia kua hage ia ʼi te temi nei ʼe mole kei feala tona fakahoko. Kua mafola te ʼu fihi foʼou ʼi te ʼu koga meʼa neʼe mole tou ʼamanaki ʼi he temi ʼe hoko ai anai; kua ʼāsili te masiva ʼi te malamanei katoa. ʼE ʼi ai te ʼu mālohi faka nukeleʼea foʼou e lua. Neʼe mole kei lahi te logona ʼo te Kautahi ʼo te ʼAtu Puleʼaga Fakatahi ʼuhi ko tana mole lava tauʼi te ʼu tokakovi ʼo te malamanei. ʼE lolotoga fetogi te fakakaukau, mai te moemisi ki te meʼa ʼaē ʼe hoko moʼoni.”
ʼE mahino ki te kau ako ʼo te Tohi-Tapu ko te ʼu faiga ʼa te tagata, logola ʼe ʼaoga, kae ʼe mole lava ke fua lelei. Koteā tona tupuʼaga? Koteʼuhi, ohage ko tona ʼui e te Tohi-Tapu: “Ko te malamanei katoa ʼe takoto ia ʼi te mālohi ʼo te agakovi.” (1 Soane 5:19, MN ) Mai tona ʼuhiga ʼaē ko Satana ʼe pule, ʼe mole lava ki te mālama ke ina foaki he ʼu ʼaluʼaga faka palatiso ohage ko tona fakatupu ʼaē e te ʼAtua.
Kae ʼe ʼi ai tatatou ʼamanaki. ʼE fakapapau mai e Sehova ʼAtua ʼe ina fakatuʼu anai te mālama tokalelei. ʼE mole ina fakatokatoka anai te ʼaluʼaga ʼo te tuʼu ʼo te ʼu faʼahiga meʼa ʼaenī, kae ʼe ina fakatupu anai he “kele foʼou” ʼe “tonu ke nofo ai te faitotonu.” (2 Petelo 3:13, MN ) ʼIo, ʼaki te Puleʼaga ʼo te ʼAtua, ʼe liliu anai totatou kele ko he nofoʼaga tokalelei pea mo fakafiafia, pea ʼe fakafiafia tuʼumaʼu anai te maʼuli pea mo te gāue ʼa te hahaʼi fakalogo fuli. Pea tahi ʼaē meʼa, ʼe fakapapau mai e te ʼAtua “e ina holoholo anai ia loimata fuape i onatou fofoga, pea e mole toe mau anai te mate. E mole toe mau anai he putu, pe ko he lauga, pe ko he mamahi.” Ko te ʼu fakapapau ʼaia ʼe mole fakatafito ki he ʼu fakakikite fakalotolotolua ʼa he tagata. Kae ʼe fakatafito ki te Folafola moʼoni ʼa te ʼAtua, ʼaē ʼe mole lava ke loi.—Apokalipesi 21:4; Tito 1:2.