ʼE Maʼuhiga Age Te Matalelei ʼo Te Loto
“KO TE TALAVOU ʼE INA FAKAPIPIKI TUʼUMAʼU TE MATALELEI KI HE KALITATE,” KO TE ʼUI ʼAIA ʼA TE KILISITIANO AGATONU KUA MATUʼA.
Ei, talu mai fualoa ko te tagata ʼe ina faka maʼuhigaʼi fau te matalelei ʼaē ʼe hā ki tuʼa, ʼo tau kovi ai tana fakafuafua ia te ʼu kalitate ʼo te loto. Kae ko totatou Tupuʼaga ʼe sio loloto ki te ʼu meʼa ʼaē ʼi totatou loto, kae mole ina tokagaʼi totatou agaaga ʼaē ʼe hā ki tuʼa. ʼAki tana fai ʼaia ʼe ina tuku mai te faʼifaʼitaki lelei ʼo ʼuhiga mo te fakasiosio poto. ʼI te Tohi-Tapu neʼe ʼui fēnei e te ʼAtua: “Ko te sio ʼa te ʼAtua ʼe mole hage ko te sio ʼa te tagata, heʼe sio te tagata ki te meʼa ʼaē ʼe hā ki te ʼu mata; kae ko Sehova, ʼe sio ki te ʼuhiga ʼo te loto.”—1 Samuele 16:7.
Ko te ʼAtua ʼe ko te Matapuna ʼo te matalelei fakatagata moʼoni, pea ʼe fakahā mai e tana Folafola moʼo fakafuafua te ʼuhiga moʼoni ʼo he tahi, ʼe maʼuhiga tāfito tona ʼu kalitate fakalaumālie. ʼE ʼui fēnei e te Tohi-Tapu: “Ko te fofoga matalelei ʼe feala ke loi, pea ko te matalelei ʼe feala ke vaʼiganoa; kae ko te fafine ʼaē ʼe manavasiʼi kia Sehova, ko ia ʼaia ka ina maʼu te ʼu fakavikiviki.” (Tāʼaga Lea 31:30) ʼI tona fakahagatonu, ko te meʼa ʼaē ʼe matalelei ki tuʼa ʼe feala pe ke ina ʼuʼufi he matakovi ʼi te loto. (Esitele 1:10-12; Tāʼaga Lea 11:22) Ko te matalelei ʼo te sino ʼe feala pe ke puli ʼaki te temi, kae ko te matalelei ʼo te loto—te ʼu kalitate ʼo te loto—ʼe feala pe ke tuputupu pea mo tologa.
Koia, ko he meʼa fakapotopoto te fakatuputupu ʼo he ʼu kalitate ohage ko te ʼofa, te fiafia, te tokalelei, te kātaki, te agalelei, te agaʼofa, te tui, te agamālū, pea mo te loto lolomi! (Kalate 5:22, 23) Koia ʼe tou lava maʼu te matalelei ʼo te loto ʼaē ʼe maʼuhiga moʼoni.—1 Petelo 3:3, 4.