ʼE Nātou Tekeʼi Te ʼu Fakahala ʼo Tonatou ʼu Kaugā Ako

TOKOLAHI ʼe nātou mulimuli ki te faʼahiga manatu pea mo te ʼu aga ʼo tonatou ʼu kaugā ako heʼe nātou loto ke tali nātou. ʼE ʼaoga tāfito ki te kau tūpulaga ke nātou lotomālohi ke feala hanatou fakafisi ki te ʼu aga ʼaē ʼe kovi, ohage ko te fakaʼaogaʼi ʼo te toloke pea mo te ʼu felāveʼi fakasino heʼeʼaoga. E feafeaʼi tanatou tekeʼi te ʼu fakahala ʼo tonatou ʼu kaugā ako?

Mole heʼeki faʼa fualoa, neʼe faitohi fēnei te ʼu kiʼi finemui e toko lua: “ ʼE ʼiloga lelei te ʼu aga ʼo te malamanei ʼi te tokolahi ʼo tomatou kaugā ako. ʼE nātou kākā ʼi tanatou ako, ʼe nātou gutu tauvele, pea ʼe nātou leleiʼia te ʼu teu faikehe pea mo heʼe fakapoipoi, pea mo te musika heʼeʼaoga. ʼI meʼa fakafiafia te ʼu alatike ʼaē ʼe talanoa kia mātou kau tūpulaga pea mo ina puipui mātou mai te fakahala ʼa te kau tūpulaga ʼe mole lelei tonatou faʼahiga maʼuli pea ʼe nātou agapauʼu!

“ ʼE mole he ʼu kupu feʼauga moʼo fakahā atu tomatou loto fakafetaʼi ʼo ʼuhiga mo te ʼu alatike ʼo Te Tule Leʼo ʼaē neʼe malave kia mātou, heʼe nātou fakahā mai ʼi tomatou ʼuhiga tūpulaga, ʼe mātou ʼaoga pea ʼe leleiʼia mātou. Neʼe ʼaoga kia mātou te tokoni ʼa te Tohi-Tapu ke mātou haga fakafiafia ia Sehova ʼAtua. ʼE mātou ʼiloʼi papau ko te tauhi agatonu kia Sehova ʼe ko te faʼahiga maʼuli ʼaē ʼe lelei.”

Ei, ʼe feala ki te kau tūpulaga ke nātou tekeʼi te ʼu fakahala. ʼI tanatou fakaʼaogaʼi tonatou ʼu “fealagia fakakaukau,” ʼe ako e te kau Kilisitiano tūpulaga te fai ʼo he ʼu tonu fakapotopoto ʼe ʼalutahi mo “te laumālie . . . ʼaē ʼe haʼu mai te ʼAtua” kae ʼe mole ʼalutahi mo “te manatu . . . ʼo te mālama ʼaenī.”—Hepeleo 5:14; 1 Kolonito 2:12, MN.