Te Tafa ʼAē ʼe Mole Fakaʼaogaʼi Ai Te Toto—“Ko He Puleʼaki Kua Lahi Tona Fai”
ʼI TE kupu tāfito ʼaenī “Ko Te Tafa ʼAē ‘ ʼe Mole Fakaʼaogaʼi Ai Te Toto,’ ” neʼe ʼui e te nusipepa Maclean, ko te ʼu tōketā ʼi Kanata neʼe nātou “fakatuputupu te ʼu puleʼaki foʼou, ʼi te ʼu taʼu e nima kua hili, pea kua liliu ko te tafa kua lahi tona fai, ʼaē ʼe higoaʼi ko te tafa ʼaē ʼe mole fakaʼaogaʼi ai te toto.” Ia nātou ʼaia ʼe kau ai ia Brian Muirhead, ko he anesthésiste (te tōketā ʼaē ʼe ina fakamoe te hahaʼi ʼaē ʼe ʼamanaki tafa) ʼi te Health Sciences Centre ʼi Winnipeg. Koteā ʼaē neʼe ina uga ia ia ke faiga ki te ʼu faitoʼo ʼaē ʼe mole fakaʼaogaʼi ai te toto?
ʼI te 1986, neʼe tafa e te tōketā ko Dr. Muirhead te tagata ʼe taʼu 70 neʼe ʼi ai tona mataʼi papala neʼe toto tuʼumaʼu, kae neʼe ina kole age he faitoʼo ʼe mole fakaʼaogaʼi ai te toto, ʼuhi ko te ʼu meʼa ʼaē ʼe tui kiai ʼi tona ʼuhiga Fakamoʼoni ʼa Sehova. (Gaue 15:28, 29) ʼE fakamatala e te nusipepa Maclean’s, ko te tōketā ko Muirhead “neʼe ina fakaʼaogaʼi te puleʼaki neʼe tahitahiga tona fakaʼaogaʼi, ko te ʼai ʼo te solution saline ki te tagata mahaki moʼo taupau tona tosio. Neʼe iku lelei te tafa ʼaia, pea neʼe tui papau ai ia Muirhead ‘kua lahi fau te foaki ʼo te ʼu foʼi huki toto. Neʼe ʼau manatu kua tonu ke kumi he ʼu faitoʼo moʼo fetogi ʼo te faitoʼo ʼaia.’ ”
Ko te kole ʼaē ke fai te ʼu tafa ʼe mole fakaʼaogaʼi ai te toto, neʼe “tupu mai te ʼu tuʼania ʼo ʼuhiga mo te fakaʼaogaʼi ʼo he toʼo ʼo he tahi kehe—pea mo te ʼu tuʼania ʼa te hahaʼi mahahaki naʼa nātou pikisia ʼi te ʼu mahaki ʼaē ʼe maʼu ʼi te ʼu foʼi huki toto.” ʼAki te ʼu kumi foʼou ʼa te ʼu tōketā, ʼe mole ʼaoga pe ki te kau Fakamoʼoni ʼa Sehova kae ʼe toe ʼaoga ki ʼihi hahaʼi tokolahi. ʼE ʼui fēnei e te nusipepa ʼaia, “ ʼuluaki ʼe lahi te ʼu faʼahi ʼe mole ʼaoga ai te ʼu foʼi huki toto, lua ʼe ina fakasiʼisiʼi te maʼu mahaki e te tafa ʼaē ʼe mole fakaʼaogaʼi ai te toto.” Māʼia mo te toto “maʼa,” ʼe feala pe ke ina fakatupu he mahaki faka temi ki te hahaʼi mahahaki, heʼe ina maumauʼi te fealagia ʼo tonatou sino ʼaē ko te tekeʼi ʼo te ʼu mahaki kehekehe.
He koʼe ʼe faiga mālohi te kau Fakamoʼoni ʼa Sehova ke nātou fakaʼaogaʼi he ʼu faitoʼo ʼe mole ʼi ai te toto? ʼE lagi koutou fia lau anai te kaupepa lahi Comment le sang peut-il vous sauver la vie ? ʼE fiafia anai te kau Fakamoʼoni ʼa Sehova ʼi te foaki atu te kaupepa ʼaia.