ʼE ʼAumai Anai Koa e Te Lotu Te Tokalelei?
MAI te ʼaho 28 ʼo aʼu ki te ʼaho 31 ʼo ʼAukusito 2000, neʼe fakatahitahi ʼi te kolo ʼo New-York te toko 500 tupu kau fakafofoga ʼo te ʼu fenua e 73. Neʼe nātou fakatahi ʼi te ʼAtu Puleʼaga Fakatahi ki te “Te Fono Ki Te Tokalelei Faka Malamanei ʼa Te Kau Takitaki Lotu.” Ko te kau takitaki ʼaia neʼe nātou fakafofoga te ʼu lotu kehekehe—pea tokolahi neʼe nātou teuteu ʼaki te ʼu kofu lanu kula ʼahoʼaho, ko ʼihi neʼe ʼi ai tanatou ʼu pale fuluʼi moa, peʼe ko ʼihi neʼe nātou tui te ʼu kofu loloa ʼuli. Neʼe kau ai te lotu Bahaʼi, te lotu Inituisi, te Jaïnisme, te lotu Mahometa, te lotu Putisi, te lotu Shintō, te Sikhisme, te lotu faka Sutea, te Taoïsme, te Zoroastrisme, pea mo te ʼu lotu ʼo te Keletiate.
Neʼe felāveʼi te kau telekē ʼaia ʼi te ʼAtu Puleʼaga Fakatahi ʼi te ʼu ʼuluaki ʼaho e lua ʼo te fakatahi ʼaia e ʼaho fā. Kae, neʼe mole fakatuʼutuʼu te fono ʼaia e te ʼAtu Puleʼaga Fakatahi kae neʼe fakatuʼutuʼu e te ʼu kūtuga kehekehe. Logope te potu ʼaia, kae ko te ʼAtu Puleʼaga Fakatahi pea mo te kau takitaki lotu neʼe nātou palalau ki te maʼuhiga ʼaē ke nātou gāue fakatahi moʼo fakagata te masiva, mo te fakapalatahi, mo te ʼu fihifihia ʼo te maumauʼi ʼo te kele, mo te tau, pea mo te ʼu mahafu tau ʼaē ʼe mamate ai te hahaʼi kaugamālie.
Neʼe sinie e te kau telekē ʼaia te pepa ʼe tohi ai te ʼu kupu ʼaenī “Ko He Faiga Ki He Tokalelei Faka Malamanei.” Logope te fakamoʼoni ʼa te pepa ʼaia ki te agamālohi pea mo te tau ʼaē ʼe “tautau fakahoko ʼaki te higoa ʼo te lotu,” neʼe ina tala ko nātou ʼaē neʼe nātou sinie te pepa ʼaia ʼe nātou “gāue fakatahi anai mo te ʼAtu Puleʼaga Fakatahi . . . ki te fakatuʼu ʼo te tokalelei.” Kae neʼe mole ʼi ai he ʼu fakatuʼutuʼu lelei neʼe nātou fakahā ai peʼe feafeaʼi anai te fakahoko ʼo te potu ʼaia.
ʼI te lua ʼaho, ko Bawa Jain, te sikalaipe takitaki ʼo te fono ʼaia, neʼe ina fakaʼosi tana ʼu palalau ʼaki te fakamahino ʼo te faʼahiga paki neʼe ina tokagaʼi ʼi te ʼu taʼu ki muʼa atu ʼi te Pilō ʼo te ʼAtu Puleʼaga Fakatahi. Neʼe ko te paki ʼe pena ai te tagata ʼe lahi age ʼi te ʼu fale ʼo te Pilō ʼo te ʼAtu Puleʼaga Fakatahi. Neʼe fisifisi ki te fale ʼaia ohage pe ko hana fisifisi ki he matapā. ʼI te lalo paki, neʼe tohi fēnei: “ ʼAliki ʼo te Tokalelei.” Neʼe ʼui fēnei e te tagata ko Jain: “Neʼe malave [te paki ʼaia] kia ʼau ʼi te lakaga ʼaē neʼe ʼau sio kiai. Neʼe ʼau fehuʼi ki te ʼu hahaʼi kehekehe peʼe koteā te faka ʼuhiga ʼo te ʼu palalau ʼaia. ʼI te temi nei ʼe ʼau mahalo kua ʼau maʼu tona tali. Ko te fakatahi ʼo koutou fuli ʼi henī, te ʼu pule takitaki lotu ʼo te malamanei, ʼe ina fakamoʼoni mai kia ʼau, ko koutou ko te ʼaliki ʼaia ʼo te tokalelei ʼaē ʼe fisifisi ki te matapā ʼo te ʼAtu Puleʼaga Fakatahi.”
ʼE mole manatu feiā te Tohi-Tapu. ʼE ina fakahā mai ko te ʼAliki ʼo te Tokalelei ʼe ko Sesu Kilisito. ʼE ina ʼaumai anai te tokalelei ki te kele katoa, kae ʼe mole ina fai anai ʼaki he ʼu faiga faka politike peʼe faka lotu ʼo te mālama ʼaenī, kae ʼaki te Puleʼaga ʼo te ʼAtua. Ko te Puleʼaga ʼaia—te puleʼaga ʼo te ʼAtua ʼi selo—ka ina lava fakatahiʼi anai te hahaʼi fakalogo pea mo fakahoko te finegalo ʼo te ʼAtua ʼi te kele.—Isaia 9:6; Mateo 6:9, 10.