Te ʼu Aga ʼe Malave Ki Te Hahaʼi

ʼI TE taʼu fuli ʼe tahi maʼopoʼopo te kau Fakamoʼoni ʼa Sehova ʼi tonatou ʼu fenua ki tanatou ʼu fakatahi lalahi faka Kilisitiano. ʼI te ʼu fakatahi ʼaia, ʼe nātou maʼu ai te ako pea mo te faka kaugā ʼe fakaloto mālohi ai nātou ʼi te faʼahi fakalaumālie. ʼAki te taʼi ʼu fakatahi ʼaia ʼe toe ʼi ai te tahi ʼu faʼahi ʼe feala ke malave ai kia nātou ʼaē ʼe kau kiai.

Ohage la, ʼi te māhina ʼo Sūlio 1999, neʼe fakatahi te toko lauʼi afe kau Fakamoʼoni ʼi Mozambique lolotoga ʼaho e tolu ʼi te Fakatahi Faka Tisitilike ʼaē ko tona kupu tāfito: “Te ʼu Lea Faka Polofeta ʼa Te ʼAtua.” Tokolahi ia nātou ʼaia neʼe ko tanatou hoki kau ʼaia ki te fakatahi. Neʼe nātou punamaʼuli ki te ʼu meʼa neʼe nātou logo pea mo sio kiai.

ʼE ʼui fēnei e te tahi neʼe kau ki te fakatahi ʼi te Fale ʼo te Fakatahi ʼo Maputo: “Ko taku hoki sio ʼaē ki te koga meʼa matalelei! ʼI te ʼu fale mamaʼo neʼe ʼi ai te ʼu foʼi topa pea mo te ʼu sioʼata, pea neʼe maʼa mo magoni. Ko he koga meʼa fīmālie ʼe mole tou logo ai ki te logoaʼa ʼa he ʼu tamaliki ʼe fihi. Pea ʼe mole nātou fehumukiʼaki! Neʼe ʼau sio ki te kau tūpulaga ʼe nātou fiafia ʼi tanatou ʼu fai palalau fakatupu lotomālohi. Neʼe ʼau toe punamaʼuli ʼi te teu maʼa ʼa te hahaʼi fuli. Mokā hoko he tahi fakatahi, ʼe ʼau ʼaumai anai taku ʼu tamaliki pea mo uga toku ʼohoana ke mātou ʼolo ki te fakatahi ʼaia.”

Ei, ʼe fakatokagaʼi te fai fakahagatonu ʼa te kau Fakamoʼoni ʼa Sehova, mo tanatou agatonu, pea mo tanatou aga maʼa. He koʼe ʼe kehekehe te kau Fakamoʼoni mo te tahi ʼu hahaʼi? Koteʼuhi ʼe nātou faiga mālohi ke nātou maʼuliʼi te ʼu meʼa ʼaē ʼe nātou ako ʼi te Tohi-Tapu. He koʼe ʼe mole koutou fakatahi mo nātou ʼi te taʼu ʼaenī ʼi tanatou ʼu fakatahi peʼe ki tanatou ʼu fono ʼi te ʼu vāhaʼa fuli ʼi te ʼu Fale ʼo te Puleʼaga, pea ke koutou sio tonu ai ki te faʼahi ʼaia?

[Paki ʼo te pasina 32]

ZAMBIE

[Paki ʼo te pasina 32]

KENYA

[Paki ʼo te pasina 32]

MOZAMBIQUE