ʼE Tologa Age ʼi Te Aulo Maʼa
ʼE LAHI te kumi ʼo te aulo ʼuhi ko tona matalelei pea mo tona tologa. ʼE lahi te fia fai kiai ʼa te hahaʼi ʼuhi ko te tologa ʼaupito ʼo tona gigila pea mo tona mole lava ʼulihi. ʼE feiā te aulo heʼe mole lava fakapopo e te vai, mo te sulifa, mo te ʼaele pea mo te tahi atu ʼu meʼa. ʼE lahi te ʼu meʼa neʼe faʼu ʼaki te aulo neʼe maʼu ʼi te ʼu vaka ʼaē neʼe moū ʼi te tai peʼe ʼi te tahi ʼu koga meʼa, ʼe maʼu atu ʼe kei gigila aipe logola kua hili kiai te ʼu taʼu ʼe lauʼi teau.
Kae ʼe lelei hatatou tokagaʼi te ʼui ʼa te Tohi-Tapu ʼe ʼi ai te meʼa ʼe tologa age, pea “ ʼe maʼuhiga age ʼi te aulo ʼaē ʼe feala ke ʼauha logope tona kua ʼahiʼahiʼi ʼi te afi.” (1 Petelo 1:7, MN ) Ko te aulo ʼaē kua “ ʼahiʼahiʼi,” peʼe kua fakamaʼa, ʼi te afi peʼe ʼi ʼihi atu puleʼaki ʼe feala ke kaku tona maʼa ki te 99,9 ʼi te teau. Kae māʼia mo te aulo ʼaē kua fakamaʼa ʼe feala ke maumau, peʼe faka pulinoa, mokā ʼai ki te eau régale, ko te faʼahiga vai ʼe fio ai te ʼu vaega tolu ʼo te acide chlorhydrique ki te vaega tahi ʼo te acide nitrique. Koia, kia mata ʼa te kau popoto, ʼe tonu te Tohi-Tapu ʼi tana ʼui ʼaē ko te ‘aulo ʼe feala ke ʼauha.’
Kae ko te tui faka Kilisitiano moʼoni ‘ ʼe ina hāofaki te nefesi.’ (Hepeleo 10:39) ʼE feala ki te tagata ke ina fakapogi he tahi ʼe mālohi tana tui, ohage ko te meʼa ʼaē neʼe hoko kia Sesu Kilisito. Kae koʼeni te fakapapau neʼe fai kia nātou ʼe nātou maʼu te tui moʼoni: “Agatonu o kaku ki te mate, pea e au foaki atu anai kia te koe te kolona o te mauli.” (Apokalipesi 2:10) Ko nātou ʼaē ʼe mamate agatonu ʼe manatuʼi nātou e te ʼAtua, pea ʼe ina fakatuʼuake anai ia nātou. (Soane 5:28, 29) ʼE mole lava fakahoko te faʼahi ʼaia e he tuʼuga aulo. ʼO ʼuhiga mo te potu ʼaia, ʼe maʼuhiga ʼaupito age te tui ʼi te aulo. Kae ke maʼuhiga feiā te tui, ʼe toe maʼua foki ke ʼahiʼahiʼi. ʼI tona fakahagatonu, ʼe ko te ‘maʼuhiga ʼaia ʼo te tui kua ʼahiʼahiʼi’ ʼaē neʼe ʼui ai e Petelo ʼe maʼuhiga age ia ʼi te aulo. ʼE fiafia anai te kau Fakamoʼoni ʼa Sehova ʼi te tokoni atu ke koutou fakatuputupu pea mo taupau he tui mālohi ki te ʼAtua moʼoni, ko Sehova, pea mo tona Alo, ia Sesu Kilisito. Maʼa Sesu, “ko te faka ʼuhiga ʼaenī ʼo te maʼuli heʼegata.”—Soane 17:3, MN.