Te Fakapale Ki Tanatou Aga

Ko te pepa ʼaia ʼe fakatoʼo e te kautahi AJOCAD (Kautahi ʼo te kau Fai nusipepa ʼo Congo, pea mo Afelika ʼo ʼuhiga mo te laga ʼo te fenua) ʼi te République démocratique du Congo moʼo “fakapale he ʼu hahaʼi peʼe ko he kautahi ʼe makehe tanatou tokoni ki te laga ʼo te fenua [ʼo Congo].”

ʼI te ʼaho 17 ʼo Novepeli 2000, neʼe fakatoʼo te fakapale ʼaia ki te kau Fakamoʼoni ʼa Sehova ki “tanatou tokoni ki te laga ʼo te hahaʼi ʼo Congo ʼaki tanatou fai ako pea mo te ʼu akonaki ʼaē ʼe maʼu ʼi tanatou ʼu tohi.”

ʼI tana fakamatalatala te fakapale ʼaia, neʼe ʼui fēnei e te nusipepa ʼo Kinshasa Le Phare: “ ʼE faigataʼa te maʼu ʼo he tagata peʼe ko he fafine Congo neʼe mole heʼeki ina lau Te Tule Leʼo peʼe ko te Réveillez-vous ! peʼe ko he tahi age pe tohi ʼa te kau Fakamoʼoni ʼa Sehova. ʼE talanoa te ʼu tohi ʼaia ki te ʼu meʼa fuli ʼo te maʼuli.” Neʼe toe ʼui e te alatike ʼaia, ko te ʼu tohi ʼaia ʼe nātou fakahā “peʼe feafeaʼi te tauʼi ʼo te ʼu fihifihia ʼo te temi nei,” pea mo fakahāhā fakalelei “te tupuʼaga moʼoni ʼo te ʼu meʼa ʼaē ʼe hoko ʼi te temi nei.” ʼE “mole fai politike pea ʼe mole fakapalatahi” te ʼu numelo fuli ʼo te Réveillez-vous ! Pea tahi ʼaē meʼa, ʼe fakatuputupu e te ʼu tohi ʼaia “te falala ʼaē ki te fakapapau ʼa te Tupuʼaga ʼo ʼuhiga mo he mālama ʼo te tokalelei, ʼaē ka ina fetogi te tuʼu agakovi ʼaenī ʼaē ʼe agatuʼu ki te lao.”

Ohage ko tona tokagaʼi e te AJOCAD, neʼe ʼaoga te ʼu tohi ʼa te kau Fakamoʼoni ʼa Sehova ki te hahaʼi ʼo Congo. ʼE maʼu tanatou ʼu tohi ʼi te ʼu lea e teau tupu, pea ʼe lagi feala pe ke toe ʼaoga tanatou logo kia koutou.

Koutou vakaʼi ʼi lalo peʼe feafeaʼi hakotou felāveʼi mo nātou.