ʼE Nātou Fakaʼaogaʼi Te Huafa ʼo Te ʼAtua ʼi Afrique Centrale
TOKOLAHI te hahaʼi ʼi Afrique centrale ʼe nātou tui ki te ʼAtua. ʼE nātou tui neʼe Ina fakatupu ia meʼa fuape. (Apokalipesi 4:11) Kae ohage pe ko te hahaʼi tokolahi ʼi te tahi ʼu fenua, ʼi te agamāhani ʼe mole nātou fia fakaʼaogaʼi tona huafa—ko Sehova.
Ko te hahaʼi ʼi Afrique centrale pea ʼi ʼihi atu ʼu potu ʼo te kele, ʼe nātou talanoa ki te huafa ʼo te ʼAtua ʼi te faikole ʼaē ko te Tāmai ʼi selo, ʼi tanatou ʼui fēnei, “Ke tapuha tou Huafa.” (Mateo 6:9) Kae lolotoga he temi fualoa, neʼe tokosiʼi te hahaʼi ʼaē neʼe nātou ʼiloʼi te huafa ʼaia. Kae hili te ʼu taʼu, ʼaki te fai faka mafola mālohi ʼa te kau Fakamoʼoni ʼa Sehova, neʼe ina fetogi ai te manatu ʼa te hahaʼi ʼo ʼuhiga mo te fakaʼaogaʼi ʼo te huafa ʼo te ʼAtua. Ia ʼaho nei, kua ʼiloʼi e te tokolahi te huafa ʼo te ʼAtua pea ʼe lahi te ʼu lea faka Afelika kua tali ai te huafa ʼaia, ohage la ʼi te lea Zulu (uJehova), mo te Yoruba (Jehofah), mo te Xhosa (uYehova) pea mo te Swahili (Yehova). Kae ʼe lahi te ʼu fakaliliu faka Tohi-Tapu ʼi te ʼu lea ʼaia mole heʼeki nātou fakaʼaogaʼi te huafa ʼo te ʼAtua.
Ko te fakaliliu lelei ʼo te Tohi-Tapu ʼaē ʼe fakaʼaogaʼi ai te huafa ʼo te ʼAtua, ʼe ko te Tohi-Tapu ʼi te lea faka Zande, ʼaē ʼe palalauʼi ʼi te République centrafricaine, mo Soudan, pea mo te République démocratique du Congo. ʼI te ʼu fenua ʼaia, ʼe fakaʼaogaʼi e te hahaʼi te huafa ʼo te ʼAtua, ʼo nātou puʼaki ko Yekova. Tatau aipe peʼe feafeaʼi tona faʼahiga puʼaki ʼi te ʼu lea, kae ʼe maʼuhiga ke tou fakaʼaogaʼi te huafa ʼaia. Koteā tona tupuʼaga? Koteʼuhi “ko ia ʼaē ʼe fetapā ki te huafa ʼo Sehova ʼe hāo anai ia.”—Loma 10:13, MN.
[Mape/Paki ʼo te pasina 32]
(Vakaʼi te mape ʼi te nusipepa)
SOUDAN
RÉPUBLIQUE CENTRAFRICAINE
RÉPUBLIQUE DÉMOCRATIQUE DU CONGO
[Haʼuʼaga ʼo te paki]
The Complete Encyclopedia of Illustration/J. G. Heck