Ko Te Ako ʼe Tou Maʼu Mai Te Fuʼu Palema

“ ʼE KO he fuʼu ʼakau matalelei ʼaupito,” ko te ʼui ʼaia ʼa te tohi sivi Tohi-Tapu ʼo ʼuhiga mo te fuʼu palema. ʼI te temi muʼa ʼo feiā pe mo te temi nei, ʼe tuʼu haʼele te ʼu fuʼu palema ʼi te ʼu vaitafe ʼo te Mafa ʼo te Nilo ʼi Esipito, pea neʼe nātou fakamalumalu te ʼu potu Toafa ʼo te Nègueb.

E teitei pe ki te ʼu fuʼu palema fuli ke tuʼu tonu. Ko ʼihi ʼe meta 30 tonatou māʼoluga pea ʼe nātou fua ia taʼu e 150. ʼIo, ʼe matalelei te ʼu fuʼu palema mokā kita sioʼi, kae ʼe toe fakatalakitupua mokā fua. ʼI te taʼu fuli ʼe lahi tona ʼu fuhiga fua. ʼE lava fua ʼi te foʼi fuhiga pe e tahi tona ʼu fua e 1 000. Pea ʼo ʼuhiga mo tona fua ʼaia, neʼe ʼui fēnei e te tagata: “Ko nātou ʼaē . . . neʼe nātou kai kiai ʼi tona kua fakamoamoa ʼo tuku ʼi te ʼu pake ʼi te ʼu fale koloā, ʼe mole nātou ʼiloʼi ʼe kano lelei age pe mokā neʼe toli fakahagatonu ʼi te fuʼu ʼakau ʼo kai atu aipe.”

Koia la ʼaē ʼe fakatatau ai e te Tohi-Tapu ʼihi hahaʼi ki he ʼu fuʼu palema. Ke leleiʼia tatou e te ʼAtua, ohage ko he fuʼu palema ʼe fua, ʼe tonu ke tou fai te aga ʼaē ʼe totonu pea mo tou haga fakatupu te ʼu fua ʼaē ʼe lelei. (Mateo 7:17-20) Ko te tupuʼaga la ʼaia, neʼe togi ai te ʼu fuʼu palema ʼi te fale lotu ʼo Salomone pea mo te fale lotu ʼaē neʼe sio kiai ia Esekiele. (1 Hau 6:29, 32, 35; Esekiele 40:14-16, 20, 22) Koia, ke leleiʼia te tauhi ʼa he tahi, ʼe tonu ke ina maʼu te ʼu agaaga ʼo te fuʼu palema. ʼE ʼui fēnei e te Folafola ʼa te ʼAtua: “ ʼE fisi anai ia ia ʼaē ʼe faitotonu ohage ko he fuʼu palema.”—Pesalemo 92:12.