“Kua ʼAu ʼIloʼi Leva Peʼe Koteā Toku Mahaki!”

NEʼE fai te ʼu palalau ʼaia e te tagata ʼi Tokyo ʼi tana ʼosi lau te fakamatala ʼi Te Tule Leʼo ʼo te ʼaho 1 ʼo Tesepeli 2000. Koʼeni te kupu tāfito ʼo te alatike “ ʼE Mole ʼIloʼi Peʼe Feafeaʼi Anai Tokotou Maʼuli ʼApogipogi,” pea neʼe fakamatala ai te maʼuli ʼo te tagata neʼe misionea kae neʼe tau mo te mahaki ʼaē ko te psychose maniaco-dépressive (ko he faʼahiga mahaki ʼulu).

Ko te tagata ʼaia neʼe ʼui fēnei ʼi tana tohi ʼaē neʼe ina fai ki te hahaʼi ʼaē neʼe nātou tā te nusipepa ʼaia: “Ko te agaaga ʼo te mahaki ʼaē neʼe fakamatala ai neʼe ʼalutahi mo te ʼu meʼa ʼaē neʼe ʼau logoʼi ʼi toku sino. Pea neʼe ʼau ʼalu ki te lopitali ʼo te kau mahaki ʼulu pea neʼe fakahā mai ʼe ʼau maʼu te mahaki ʼaia. Neʼe punamaʼuli te tōketā ʼaē neʼe ina vakaʼi ʼau. Neʼe ina ʼui fēnei, ‘ ʼE tahitahiga te ʼiloʼi e te hahaʼi ia tanatou kua maʼu te mahaki ʼaia.’ Neʼe tokoniʼi ʼau ke ʼau tauʼi te mahaki ʼi muʼa ʼo tana liliu ʼo kovi ʼaupito.”

ʼE ʼaoga ki te lauʼi miliona hahaʼi ʼi te malamanei te ʼu alatike mai te ʼu nusipepa ʼaē ko Te Tule Leʼo pea mo te Réveillez-vous ! ʼE nātou maʼu ai te ʼu alatike ʼaoga pea mo te ʼu logo. ʼI te temi nei kua tā Te Tule Leʼo kia lea e 141, pea ko te Réveillez-vous ! kia lea e 86. ʼE lagi koutou leleiʼia anai te lau tuʼumaʼu ʼo Te Tule Leʼo pea mo te Réveillez-vous !