‘ ʼAki Te Mālama ʼe Mātou Sisio Ai Ki Te Mālama’
ʼI TE agamāhani ʼe mole tou tokagaʼi te mālama, kae ʼe hoki tou tokagaʼi pe ʼi te ʼaho ʼaē ʼe motu ai te hila pea mo fakapōʼuli ai. Kae meʼa lelei foki, heʼe ko totatou “matapuna ʼo te mālama” ʼaē ʼi te lagi—ia te laʼā—ʼe tou ʼiloʼi ʼe mālama tuʼumaʼu anai. Pea ʼaki te mālama ʼaē ʼe haʼu mai te laʼā, ʼe tou lava sisio, mo tou kakai, mo tou mānava pea mo tou maʼuʼuli.
Mai te ʼaluʼaga ʼaē ko te mālama ʼe maʼuhiga ki te maʼuli, koia ʼe mole tou punamaʼuli ʼi tatatou lau ʼi te tohi ʼo Senesi, ko te mālama neʼe hā ʼi te ʼuluaki ʼaho ʼo te fakatupu. “Neʼe ʼui e te ʼAtua: ‘Ke hā te mālama.’ Pea neʼe hā ai te mālama.” (Senesi 1:3) Neʼe mahino ki te ʼu tagata fakaʼapaʼapaʼia ohage ko te Hau ko Tavite, ko Sehova ʼe ko te matapuna ʼo te maʼuli pea mo te mālama. Neʼe tohi fēnei e Tavite: “ ʼE maʼu ia te koe te matapuna ʼo te maʼuli. ʼAki te mālama ʼaē ʼe haʼu mai ia te koe, ʼe mātou sisio ai ki te mālama.”—Pesalemo 36:9.
ʼE faka ʼuhiga te ʼu palalau ʼa Tavite ki te ʼaluʼaga fakatātā pea mo te ʼaluʼaga moʼoni. ʼE fakatokagaʼi fēnei e te tohi Encyclopædia Britannica: “ ʼE mahino papau ia, ko te mālama ʼaē ʼe ina faka fealagia mai ke tou sisio.” ʼE ina toe ʼui fēnei: “ ʼI te ʼu koga fuli ʼo te sino, ʼe ko te ʼu mata ʼaē ʼe lahi age te ʼu logo ʼaē ʼe ina fakakaku ki te ʼuto.” Mai te ʼaluʼaga ʼaē ʼe lahi te ʼu meʼa ʼe tou ako ʼe fakalogo ki te sio—ʼaē ʼe ʼaoga kiai te mālama ke sio lelei—koia ʼe toe fakaʼaogaʼi foki ʼi te Tohi-Tapu ʼi hona faka ʼuhiga fakatātā.
Koia neʼe ʼui fēnei ai e Sesu ki tana ʼu tisipulo: “E ko au te malama o te malama-nei; ko ae e mulimuli mai ia te au, e mole haele anai ia i te fakapouli, kae e ina mau anai te malama o te mauli.” (Soane 8:12) Ko te mālama fakatātā ʼaē neʼe palalau kiai ia Sesu neʼe ko te logo ʼo ʼuhiga mo te moʼoni ʼaē neʼe ina faka mafola, ʼaē ʼe ina lava fakainaina te ʼu ʼatamai mo te ʼu loto ʼo te hahaʼi ʼaē neʼe nātou fagono ki ai. Hili kiai te ʼu taʼu ʼo te fakapōʼuli fakalaumālie, neʼe kua lava mahino leva te kau tisipulo ʼa Sesu ki te finegalo ʼo te ʼAtua ʼo ʼuhiga mo te malamanei pea mo te ʼamanaki ʼo te Puleʼaga. Neʼe ko te ‘mālama moʼoni ʼaia ʼo te maʼuli,’ koteʼuhi ko te ʼatamai mālama ʼaia neʼe ina lava taki ki te maʼuli heʼegata. Neʼe faikole fēnei ia Sesu ki tana Tāmai ʼe ʼi selo: “Ko te mauli heegata aeni, ke natou iloi koe, te Atua e tahi mo mooni pea mo ia ae nee ke fekaui mai, ia Sesu Kilisito.” (Soane 17:3) ʼOfa pe ke ʼaua naʼa tou ʼui ko he meʼa māhani te mālama fakalaumālie!