ʼU Mātuʼa—Taupau Takotou Fānau!
ʼE ʼAOGA ki te fānau ke takitaki ia nātou pea mo akonakiʼi nātou ʼaki te ʼofa, tāfito e tanatou ʼu mātuʼa. ʼO ʼuhiga mo te faʼahi ʼaia, ʼe ʼui fēnei e te tagata faiako mai Pelesile ko Tania Zagury: “Ko te meʼa ʼaē ʼe faiga māhani kiai te tamaliki fuli ʼe ko te kumi ʼo te ʼu fakafiafia. ʼE ʼaoga ke fakatuʼu he ʼu tuʼakoi. ʼE ko te ʼu mātuʼa ʼaē ʼe tonu ke nātou fai te faʼahi ʼaia. Kapau ʼe mole nātou fai te faʼahi ʼaia, pea ʼe mole feala anai he takitaki ʼo te fānau.”
Kae ʼe lahi te ʼu fenua ʼe mālohi ai te faʼifaʼitaliha pea ʼe ina uga ke kita fai te meʼa ʼaē kita loto kiai, ʼo faigataʼa ai ki te ʼu mātuʼa tanatou mulimuli ki te tokoni ʼaē ʼi ʼoluga. ʼE lava kumi tokoni kifea te ʼu mātuʼa? ʼE mahino ki te ʼu mātuʼa ʼaē ʼe manavasiʼi ki te ʼAtua ko tanatou fānau ʼe “ko he tofiʼa mai ia Sehova.” (Pesalemo 127:3) Koia ʼe nātou haga ai ki te Folafola ʼa te ʼAtua, te Tohi-Tapu, ʼo ʼuhiga mo te taupau ʼo tanatou fānau. Ohage la, ʼe ʼui fēnei e Tāʼaga Lea 13:24: “Ko ʼaē ʼe mole ina fia fakaʼaogaʼi te kauʼi ʼakau ʼe fehiʼa ia ki tona foha, kae ko ʼaē ʼe ʼofa ki ai ʼe ina kumi ia ia ʼaki te akonaki.”
Ka fakaʼaogaʼi e te Tohi-Tapu ia te kupuʼi palalau “kauʼi ʼakau,” ʼe mole tonu ke tou ʼui ʼe faka ʼuhiga pe ki he tā ʼo te tamasiʼi; kae ʼe faka ʼuhiga ia ki te faʼahiga ako, he faʼahiga ako pe ʼe tonu ke fai. ʼI tona fakahagatonu pea ʼi te agamāhani, ʼe lagi ʼaoga pe ia ke palalauʼi te tamasiʼi moʼo fakatonutonuʼi tana aga ʼaē ʼe kovi. ʼE ʼui fēnei e Tāʼaga Lea 29:17: “Akonakiʼi tou foha, pea ʼe ina fakafimālieʼi anai koe pea mo ina foaki atu anai he fiafia ki tou nefesi.”
ʼE ʼaoga ke akonakiʼi te fānau ʼi te ʼofa moʼo pulihi ia nātou te ʼu aga ʼaē ʼe kovi. Ko te faʼahiga ako mālohi ʼaia pea mo fai ʼaki te ʼofa, ʼe ina fakamoʼoni ai ko he tāmai peʼe ko he faʼe ʼe tokaga lelei ki tana tamasiʼi. (Tāʼaga Lea 22:6) Koia ʼu mātuʼa, koutou kātaki! Kapau ʼe koutou mulimuli ki te tokoni lelei pea mo ʼaoga ʼa te Tohi-Tapu, ʼe koutou fakafiafia anai ia Sehova ʼAtua, pea mo fakaʼapaʼapaʼi anai koutou e takotou fānau.