Ko Te ʼu Gāue Lelei ʼe Nātou Faka Kolōliaʼi Te ʼAtua
ʼAKI tanatou aga pea mo tanatou ʼu gāue ʼaē ʼe lelei, ʼe fakatupu ai e te kau Kilisitiano moʼoni he faka kolōlia ki te ʼAtua. (1 Petelo 2:12) Ko te meʼa ʼaia neʼe ʼiloga ʼaki te meʼa neʼe hoko ʼi Italia ʼi te ʼu taʼu pe ʼaenī kua hili.
ʼI Sepetepeli 1997, neʼe hoko te mafuike ʼi te ʼu potu kehekehe ʼo te ʼu koga meʼa ʼo Marches pea mo Ombrie, ʼo maumau ai te ʼu ʼapi ʼe teitei 90 000. Neʼe foimo ʼolo atu aipe te ʼu kūtuga ʼo te kau Fakamoʼoni ʼa Sehova ʼo tokoni ki ʼonatou tēhina pea mo ʼihi. Ko te ʼu caravanes, mo te ʼu meʼa kafu, mo te ʼu gutuʼumu, mo te ʼu masini hila, pea mo ʼihi atu ʼu meʼa ʼaoga neʼe fetuku ki te koga meʼa ʼaia. Neʼe tokagaʼi e te hahaʼi te ʼu gāue ʼaia.
ʼE fakamatala fēnei e te nusipepa Il Centro: “Ko nātou ʼaē neʼe ʼuluaki tau mai mo te ʼu meʼa moʼo fakafimālieʼi te hahaʼi ʼo te ʼu koga meʼa ʼaē neʼe tuʼutāmakiʼia, ko te kau Fakamoʼoni ʼa Sehova ʼo Roseto [ʼi te potu fenua ʼo Teramo] . . . ʼI tuʼa atu ʼo tanatou fono tuʼumaʼu moʼo faikole, ko te kau agatonu ʼaia kia Sehova neʼe nātou fai te ʼu gāue moʼo tokoni kia nātou ʼe mamahi, ʼo mole nātou lau pe ko te lotu fea ʼaē ʼe nātou kau ai.”
Ko te pule kolo ʼo Nocera Umbra, te kolo neʼe kovi ʼosi tona maumau, neʼe faitohi fēnei ki te kau Fakamoʼoni: “ ʼE ʼau fakamālo totonu atu ʼaki toku loto katoa ki takotou tokoni ki te hahaʼi ʼo Nocera. ʼE ʼau ʼiloʼi papau ʼe ʼau fakahā atu te meʼa ʼe logoʼi e te hahaʼi fuli ʼo te kolo ʼaia.” Pea tahi ʼaē meʼa, neʼe fakatoʼo e te Ministère de lʼIntérieur ki te Congregazione Cristiana dei Testimoni di Geova (te Kokelekasio faka Kilisitiano ʼo te kau Fakamoʼoni ʼa Sehova) te pepa moʼo fakamālo kiai, ʼo feiā mo te metai ki te gāue hāofaki ʼaē neʼe nātou fai ʼi te ʼu koga meʼa ʼo Ombrie pea mo Marches.”
ʼI ʼOketopeli ʼo te taʼu 2000, neʼe hoko te lōfia ʼi te koga meʼa ʼo Piémont ʼi te potu noleto ʼo Italia. ʼO feiā mo te koga meʼa ʼaia, neʼe foimo ʼōmai te kau Fakamoʼoni ʼo foaki te ʼu tokoni. Neʼe toe tokagaʼi mo te ʼu gāue lelei ʼaia. Neʼe foaki e te hahaʼi ʼo te koga meʼa ʼo Piémont te lauʼi papa moʼo fakamanatu ki tanatou “gāue maʼuhiga pea mo lotolelei moʼo tokoni ki te hahaʼi ʼo Piémont neʼe hoko ki ai te lōfia.”
Neʼe fakatotonu e Sesu ki tana ʼu tisipulo: “Ke mū tokotou mālama ʼi muʼa ʼo te hahaʼi, koteʼuhi ke nātou mamata ki ʼakotou gāue lelei pea nātou faka kolōlia ai ki takotou Tāmai ʼaē ʼe ʼi selo.” (Mateo 5:16, MN ) ʼE mole faka kolōliaʼi e te kau Fakamoʼoni ʼa Sehova ia nātou totonu, kae ʼe nātou faka kolōliaʼi ia te ʼAtua ʼaki ʼanatou “gāue lelei” ʼo tokoni ki te hahaʼi ʼi te faʼahi fakalaumālie pea mo ʼihi faʼahi.