ʼAua Naʼa Kākāʼi Koutou

KO TE kākā ʼe ko he meʼa kua hoko talu mai fualoa. Ko te ʼuluaki meʼa ʼaē neʼe hoko ʼi te hisitolia neʼe ko te kākā. Neʼe hoko te faʼahi ʼaia ʼi te ʼōloto ʼo Eteni, ʼi te temi ʼaē neʼe kākāʼi ai e Satana ia Eva.—Senesi 3:13; 1 Timoteo 2:14.

Logola neʼe hoko talu mai ai te kākā ʼi te kele, kae kua lahi tāfito ia ʼaho nei. ʼO ʼuhiga mo totatou temi, neʼe fakatokagaʼi fēnei e te Tohi-Tapu: “Ko te hahai agakovi mo kaka e fakaʼalu anai tonatou koviʼage, e natou fakahehe anai te kaiga pea mo natou.”—2 Timoteo 3:13.

ʼE kākāʼi te hahaʼi ʼi hona ʼu ʼaluʼaga kehekehe. Ko te hahaʼi kākā pea mo nātou ʼaē ʼe mole nātou fakahoko tanatou ʼu fakapapau, ʼe nātou loiʼi te hahaʼi ke feala hanatou kaihaʼa tanatou falā. Ko te hahaʼi fai politike ʼe nātou kākāʼi te hahaʼi ʼaē ʼe vote maʼa nātou, heʼe nātou fia taupau tonatou ʼu tuʼulaga. Ko te hahaʼi ʼe nātou kākāʼi ia nātou totonu. ʼI tanatou mole fia tali te moʼoni ʼaē ʼe mole faʼa leleiʼia, ʼe nātou manatu ai ko te ʼu meʼa ʼaē ʼe nātou fai ʼe mole hona ʼu fua kovi, ohage ko te suluka, te toloke, peʼe ko te ʼu felāveʼi fakasino heʼeʼaoga.

Pea ʼe toe kākāʼi te hahaʼi e te lotu. Ko te kau takitaki lotu ʼi te temi ʼo Sesu neʼe nātou kākāʼi te hahaʼi. ʼO ʼuhiga mo te hahaʼi kākā ʼaia, neʼe ʼui fēnei e Sesu: “Ko te kau takitaki kivi ia nātou. Pea kapau ʼe taki e he kivi ia he tahi kivi, pea ʼe nā fetōki toko lua anai ia nāua ki he luo.” (Mateo 15:14, MN ) Tahi ʼaē meʼa, ʼe kākāʼi e te hahaʼi ia nātou totonu ʼo ʼuhiga mo te lotu. ʼE ʼui fēnei ia Tāʼaga Lea 14:12: “ ʼE ʼi ai te ala ʼe matatonu ki te tagata, kae ʼe iku ia ki te ʼu ala ʼo te mate.”

Ohage ko te temi ʼo Sesu, tokolahi ia ʼaho nei ʼe kākāʼi nātou e te lotu, pea ʼe mole tou punamaʼuli kiai! Neʼe ʼui e te ʼapositolo ko Paulo ko Satana neʼe ina “fakakiviʼi te ʼatamai ʼo nātou ʼaē ʼe mole tui ke ʼaua naʼa faka mālamagia nātou e te mālama gigila ʼo te logo lelei faka kolōlia ʼo ʼuhiga mo Kilisito, ʼaē ko te paki ʼo te ʼAtua.”—2 Kolonito 4:4, MN.

Kapau ʼe kākāʼi tatou e he tahi ʼe fai fakatau, pea ʼe puli ai tatatou falā. Kapau ʼe kākāʼi tatou e he tagata fai politike, pea ʼe feala ke puli ai tatatou ʼāteaina. Kae kapau ʼe kākāʼi tatou e Satana ʼo tou līaki te moʼoni ʼo ʼuhiga mo Sesu Kilisito, pea ʼe puli ai totatou maʼuli heʼegata! Koia ʼaua naʼa kākāʼi koutou. Koutou tali ʼi takotou manatu pea mo tokotou loto te matapuna ʼo te lotu moʼoni ʼaē ʼe tau mo te falala, ia te Tohi-Tapu. Kapau ʼe mole tou fai te faʼahi ʼaia pea ʼe lahi te ʼu lelei ʼe mole tou maʼu anai.—Soane 17:3.