‘Koutou Liliu ʼo Poto ʼi Tokotou Temi Ka Haʼu’

“Tokolahi te hahaʼi ʼe nātou fakaʼaogaʼi tonatou ʼu ʼuluaki taʼu ke liliu ko honatou maʼuli fakaʼofaʼofa ʼi tonatou ʼu taʼu fakaʼosi.” Neʼe fai te ʼu palalau ʼaia e Jean de La Bruyère, ko he tagata faitohi Falani ʼo te 17 sēkulō. ʼI tona fakahagatonu, ʼe feala pe ke fakalākilua te tūpulaga ki te ʼu faigamālie ʼe ina maʼu, ʼo ina fai he meʼa ʼe fakatupu mamahi kia ia. ʼI te tahi faʼahi, ko he tūpulaga ʼe logogataʼa ʼe feala ke ina haga fai he meʼa ʼe kovi, ʼo mole feala anai ki ʼamuli ke maʼuli fiafia. Ko te ʼu agahala ʼuhi ko te mole fai ʼo te meʼa ʼaē ʼe lelei pea mo te fai ʼo te meʼa ʼaē ʼe kovi ʼe feala ai ke ina taki ki te toe mamahi.

ʼE lava tekeʼi feafeaʼi te taʼi meʼa ʼaia? ʼI tana fakatokaga ki te lotolotolua ʼa te kau tūpulaga, koʼeni te tokoni ʼa te Folafola ʼa te ʼAtua ki te kau tūpulaga: “Manatuʼi tou Tupuʼaga Lahi ʼi te ʼu ʼaho ʼo tou temi tūpulaga, ia muʼa ʼo te hoko mai ʼo te ʼu ʼaho faigataʼa, peʼe ko te ʼu taʼu ʼaē ka ke ʼui ai anai: ‘Neʼe mole ʼau fiafia ʼi te ʼu taʼu ʼaia.’ ” (Tagata Tānaki 12:1) Kapau ko koutou ko he ʼu tūpulaga, koutou ako ke koutou ʼiloʼi tokotou “Tupuʼaga Lahi” ʼi te temi ʼaē ʼe kei koutou tūpulaga ai.

Koia ʼe tokoni feafeaʼi te Tohi-Tapu ki te kau tūpulaga ke nātou fakamamaʼo mai te agavale? ʼE ina ʼui fēnei: “Fakalogo ki te tokoni pea mo tali te akonaki, koteʼuhi ke ke liliu ʼo poto ʼi tou temi ka haʼu.” (Tāʼaga Lea 19:20) ʼE toe fakahā fakalelei foki e te Tohi-Tapu te ʼu ikuʼaga fakaʼofaʼofa ʼe hoko mokā kita lītuʼa ki te poto fakaʼatua ʼuhi ko he fakaʼaoʼaoganoa peʼe ko te agatuʼu ʼi te temi tūpulaga. (Tāʼaga Lea 13:18) Kae ko te fakalogo ki te ʼu fakatotonu fakaʼatua ʼe ina fakatupu ai “te loaloaga ʼo te ʼu ʼaho, pea mo te ʼu taʼu maʼuli pea mo te tokalelei,” ko he maʼuli fiafia pea mo ʼaoga.—Tāʼaga Lea 3:2.