“ ʼE Ke Tonu, ʼe Lelei ʼAupito Ia Te Maʼuli!”

ʼE KOUTOU fia ʼiloʼi te ʼuhiga moʼoni ʼo te maʼuli? Ko Magdalena, ko te Fakamoʼoni ʼa Sehova ʼe taʼu hogofulu-ma-valu ʼe nofo ʼi te kolo ko Szczecin, ʼi Polonia, neʼe tokoni ki tona kaugā ako ko Katarzyna ʼo ʼuhiga mo te faʼahi ʼaia. Neʼe fakahā age e Katarzyna ʼe mole tui ki te ʼAtua, kae ʼi te palalau age ʼa Magdalena ʼo ʼuhiga mo te Tohi-Tapu, neʼe fia logo kiai.

Logope neʼe leleiʼia e Katarzyna ia te ʼu meʼa ʼaē ʼe fakahā age Magdalena ʼi te Tohi-Tapu, kae neʼe mole ina lava tali katoa. ʼI tana fai palalau mo Magdalena ʼo ʼuhiga mo te ʼu kaumeʼa moʼoni, neʼe ʼui fēnei e Katarzyna: “ ʼE ke nofo mo te Tohi-Tapu; ʼe ke ʼiloʼi te ʼu pelesepeto ʼaē ʼe tonu ke maʼuliʼi pea kofea ʼaē ʼe kita maʼu ai te ʼu kaumeʼa moʼoni. Kae e feafeaʼi kia nātou ʼaē, ʼo aʼu mai ki te temi nei, ʼe mole nātou tali te ʼu pelesepeto ʼaia?”

Neʼe fetogi te fakakaukau ʼa Katarzyna ʼi tana folau ki Lonitoni, ʼi Pilitania. Neʼe ina ʼaʼahi te filiale ʼa te kau Fakamoʼoni ʼa Sehova ʼaē ʼe tuʼu ʼi te kolo ʼaia, pea neʼe malave kia ia te agalelei ʼaē neʼe fai age ki ai. Neʼe malave kia ia te ʼu aga ohage la ko te avahi age ʼo te matapā, pea mo te tokaga fakalelei age ki ai mokā palalau.

ʼI te hoko ʼo te hū ako ʼi Sepetepeli 2001, neʼe fakatotonu e Katarzyna ke fai tuʼumaʼu tana ako faka Tohi-Tapu. Kua ina leleiʼia te ʼu pelesepeto faka Tohi-Tapu pea kua ina kamata maʼuliʼi. Mole heʼeki faʼa fualoa, neʼe ina fakahā fēnei kia Magdalena: “ ʼE hage ia ʼe ʼau kamata toku maʼuli foʼou.” Pea neʼe ina fakahā te kiʼi logo nounou ʼi te telefoni: “ ʼE ʼau fakamālo lahi ʼatu ki tatatou ako ʼi te ʼaho nei! ʼE ke tonu, ʼe lelei ʼaupito ia te maʼuli! Ko he meʼa fakaofoofo te ʼiloʼi ʼo ia ʼaē ʼe tonu ke tou fakamālo ki ai.”