Te Fakamanatuʼi ʼo Te ʼu Fakamoʼoni ʼa Sehova Neʼe Fakapogi

I TE ʼaho 7 ʼo Malesio ʼo te taʼu 2002, neʼe toʼo te kie ʼaē neʼe pūlouʼi ʼaki te papa fakamanatu ʼi te kolo ko Körmend, ʼi te potu uesite ʼo Hukalia. Ko te maka ʼaia ʼe ina fakamanatuʼi te mate ʼo te ʼu Fakamoʼoni ʼa Sehova e toko tolu neʼe matehi e te kau Nasi ʼi te taʼu 1945.

ʼE pipiki te lauʼi papa ʼaia ʼi te kaupā ʼo te ʼu pilō tāfito ʼo te kau tamate afi ʼo te ala ʼo Hunyadi, ʼaē neʼe matehi ai ia nātou ʼaia. Neʼe fakatuʼu ia te lauʼi papa ʼaia moʼo fakamanatu ‘te kau Kilisitiano ʼaē neʼe matehi ʼi tanatou fakafisi ki te hū solia ʼi te māhina ʼo Malesio ʼo te taʼu 1945. Ko Antal Hőnisch (1911-1945), Bertalan Szabó (1921-1945), János Zsondor (1923-1945), taʼu 2002, ko te kau Fakamoʼoni ʼa Sehova.’

Neʼe matehi ia nātou ʼaia ʼi te ʼu māhina e lua ʼi muʼa ʼo te ʼosi ʼo te Lua Tau Faka Malamanei. He koʼe neʼe matehi te ʼu Kilisitiano ʼaia? ʼE fakamahino fēnei e te nusipepa Hukalia te Vas Népe: “ ʼI te temi pe ʼaē neʼe pule ai ia Itilele ki Siamani, neʼe mole ko te kau Sutea pe ʼaē neʼe gaohi koviʼi pea mo fakatagaʼi, kae neʼe kau ai foki mo te kau Fakamoʼoni ʼa Sehova, pea neʼe ʼave ia nātou ki te ʼu lotoʼā fakamamahi pea mo te lotoʼā fakamate mo kapau neʼe mole nātou fakafisi ki tanatou tui. . . . ʼI te māhina ʼo Malesio ʼo te taʼu 1945, neʼe mafola te ʼu meʼa fakamatakutaku ʼaupito ʼi te potu uesite ʼo Hukalia. . . . ʼI te ʼu meʼa fakamatakutaku ʼaia neʼe kau ai te fetuku pea mo te matehi ʼo te kau Fakamoʼoni ʼa Sehova.”

Neʼe koga lua ia te polokalama ʼaē neʼe fakatuʼutuʼu ki te fakahāhā ʼo te lauʼi papa fakamanatu. Neʼe fai te ʼuluaki koga ʼi te teate ʼo Batthyány Castle, ʼaē neʼe kau ai te kau tagata fai fakamatala ia te polofesea ko Szabolcs Szita, ʼe pule ki te tānakiʼaga ʼo te ʼu fakamatala ʼo ʼuhiga mo te Holokoseta ʼi Budapest; mo László Donáth, ʼe kau ki te komite ʼe tokaga ki te ʼu fealagia ʼo te tagata mo te ʼu meʼa ʼe ʼaoga ki te faʼahi faka lotu pea mo te ʼu meʼa ʼo te ʼu kiʼi kūtuga; pea mo Kálmán Komjáthy, neʼe sio mata ki te matehi ʼo te hahaʼi pea ʼi te temi nei ʼe ko te tagata fai fakamatala ʼo te hisitolia ʼo te kolo. Hili ʼaia pea neʼe haʼele te toko 500 ʼaē neʼe kau ki te fakamanatu ʼaia ʼo nātou fakalaka ʼi te kolo ʼo ʼolo ʼo fakahoko te lua koga ʼo te polokalama—ko te toʼo ʼo te kie ʼaē neʼe pūlou ʼaki te lauʼi papa e József Honfi ia te pule kolo ʼo Körmend.

ʼI tana tohi tauʼinē, neʼe fakaloto mālohiʼi e Ján Žsondor (János Zsondor) tona ʼu tēhina mo tuagaʼane Kilisitiano ke ʼaua tanatou lotomamahi. Neʼe ina tohi fēnei: “ ʼE kei ʼau manatuʼi pe te ʼu palalau ʼa Soane ʼe maʼu ia Apokalipesi 2:10: ‘Nofo agatonu ʼo kaku ki te mate.’ . . . Fakahā kia nātou ʼo te kokelekasio ke ʼaua tanatou lotomamahi, koteʼuhi ʼe ʼau mate maʼa te moʼoni, kae ʼe mole ʼau mate ohage ko he tagata agakovi.”

[Paki ʼo te pasina 32]

Bertalan Szabó

[Paki ʼo te pasina 32]

Antal Hőnisch

[Paki ʼo te pasina 32]

Ján Žondor