Te Fakamalotoloto ʼe Lelei, Kae ʼe Feʼauga Aipe Koa?
ʼE LELEIʼIA koa te fakamalotoloto ki totatou maʼuli ʼo te ʼaho fuli? ʼE faka ʼuhiga fēnei “te fakamalotoloto” e te tikisionalio, “ko te mole ʼi ai ʼo te malualoi; ko te agatonu; ko te fai fakahagatonu.” ʼE mahino ia ko te kalitate ʼaia ʼe ʼaoga ki te fakamālohiʼi ʼo he ʼu felogoi lelei mo niʼihi. Neʼe fēnei te tokoni ʼa te ʼapositolo ko Paulo: “Koutou fakalogo ia meʼa fuli kia nātou ʼaē ko ʼokotou pule ʼi te kakano, ʼo mole koutou kaugana ʼuhi pe ke sioʼi koutou pea mo koutou fia matalelei ki te tagata, kae ʼaki he loto fakamalotoloto pea mo te manavasiʼi kia Sehova.” (Kolose 3:22, MN ) Ko ai ʼaē ʼe mole fia fai ki he tahi ʼe gāue fakamalotoloto? ʼI te temi nei, ʼe lagi faigafua age ki te hahaʼi fakamalotoloto hanatou maʼu gāue pea mo taupau te gāue ʼaia.
Kae ko te meʼa ʼaē ʼe maʼuhiga tāfito ai ia te fakamalotoloto, ʼe ko tona faʼahiga fakaʼaogaʼi ʼi tatatou ʼu felogoi mo te ʼAtua. Neʼe tapuakina te kau Iselaele ʼo te temi muʼa ʼuhi ko tanatou muliʼi fakalelei te ʼu lao pea mo te ʼu ʼaho fakafiafia. ʼI tana palalau ki te maʼa ʼo te kokelekasio, neʼe fakaloto mālohiʼi fēnei te kau Kilisitiano e Paulo: “Tou fai te lafeti, ʼo mole fai ʼaki te meʼa fakatupu ʼāfea, peʼe ʼaki he meʼa fakatupu ʼo te agakovi pea mo te kākā, kae ke fai ʼaki he ʼu keke mole honatou meʼa fakatupu, ʼo te fakamalotoloto pea mo te moʼoni.” (1 Kolonito 5:8, MN ) Ke tali leleiʼi tatatou tauhi e te ʼAtua, ʼe ko he meʼa lelei te fakamalotoloto, kae ʼe toe maʼuhiga foki. Kae koutou tokagaʼi, ʼe mole feʼauga pe ki te fakamalotoloto. ʼE tonu ke ʼalutahi mo te moʼoni.
Neʼe lagi tui fakamalotoloto ia nātou ʼaē neʼe nātou faʼu te foʼi vaka Titanic ʼo feiā mo te kau folau, ʼe mole feala ia ke moū ʼi he temi. Kae ʼi tana ʼuluaki folau ʼi te taʼu 1912, neʼe ʼī ki te foʼi ʼaisi ʼi te tai pea neʼe mamate ai te toko 1 517 hahaʼi. Ko te tahi kau Sutea ʼo te ʼuluaki sēkulō neʼe lagi nātou tauhi fakamalotoloto ki te ʼAtua, kae ko tanatou faʼafai neʼe “mole ʼalutahi mo te ʼatamai mālama totonu.” (Loma 10:2, MN ) Ke tali leleiʼi tatou e te ʼAtua, ʼe tonu ki te ʼu meʼa ʼaē ʼe tou tui fakamalotoloto kiai, ke fakatafito ki te manatu ʼaē ʼe totonu. ʼE fiafia anai te kau Fakamoʼoni ʼa Sehova ʼo tokotou nofoʼaga ʼi te tokoni atu kia koutou ke koutou vakaʼi peʼe koteā ʼaē ʼe fakapipiki ki te tauhi ki te ʼAtua ʼaki te fakamalotoloto mo te moʼoni.