“Neʼe ʼAu Maʼu Te ʼu Meʼa Fuli Neʼe ʼAoga Kia ʼAu”
ʼE FAKAFUAFUA e te Organisation mondiale de la santé (Kautahi Faka Malamanei Ki Te Maʼuli Haohaoa), ko te toko 120 miliona hahaʼi ʼi te malamanei katoa ʼe nātou tau nei mo te lotomamahi ʼaupito. ʼI te taʼu fuli, ko te tahi miliona hahaʼi ʼe nātou fakamate pea ko te toko 10 ki te toko 20 miliona ʼe mole iku tanatou faigaʼi ʼaē ke nātou fakamate. Koteā la he faʼahiga tokoni ʼe lava fai kia nātou ʼe tau mo he lotomamahi feiā? ʼE feala pe ke fakamaʼamaʼa te mamahi ʼaia ʼaki he ʼu faitoʼo, pea mo he lagolago ki te meʼa ʼaē ʼi tona loto. Kae ʼe ʼi ai ʼihi ʼe nātou tau mo te mamahi ʼaia, neʼe nātou maʼu he tokoni mai te ʼu tohi faka Tohi-Tapu ʼa te kau Fakamoʼoni ʼa Sehova, pea ʼe ʼiloga ʼi te tohi ʼaenī mai Falani.
“Neʼe mole heʼeki faʼa fualoa, neʼe mole kei ʼau ʼiloʼi he ʼuhiga ʼo te hoko atu ʼo toku maʼuli. Neʼe ʼau faikole ki te ʼAtua ke ina tuku ke ʼau mate. Neʼe hage pe ia neʼe kua ʼau mate ʼi toku loto sino. ʼI taku kumi he puleʼaki ki te fihifihia ʼaia, neʼe ʼau faikole fakamalotoloto kia Sehova. Neʼe ʼau fakatotonu ai foki ke ʼau lau mo te Annuaire des Témoins de Jéhovah 2002, pea neʼe ʼau lau katoa ia ʼaho e tolu. Neʼe lahi ʼaupito toku fakaloto mālohiʼi pea neʼe fakamālohiʼi ai mo taku tui.
“Neʼe ʼau fai te ʼu kumi ʼi te ʼu Tule Leʼo pea mo te ʼu Réveillez-vous !, pea neʼe ʼau punamaʼuli! Neʼe ʼau lau tuʼumaʼu ia te ʼu nusipepa ʼaia lolotoga taʼu ʼe laka ʼi te ʼu taʼu e 15, kae neʼe mole ʼau mahino ki te fakaloto mālohi ʼaupito pea mo te fakaloto fīmālie ʼo te ʼu alatike. ʼE fonu ai te ʼofa—ko he kalitate kua tahitahiga tona maʼu ʼi te temi nei. Neʼe ʼau maʼu te ʼu meʼa fuli neʼe ʼaoga kia ʼau.”
ʼE ʼui fēnei e te Tohi-Tapu: “Ko Sehova ʼe ōvi kia nātou ʼaē ʼe loto lavea; pea ʼe ina hāofaki ia nātou ʼaē ʼe taʼomia tonatou laumālie.” (Pesalemo 34:18) ʼE mahino ia, ko nātou fuli ʼaē ʼe ‘lavea tonatou loto’ peʼe “taʼomia tonatou laumālie,” ʼe feala ke nātou maʼu he fakaloto mālohi pea mo he ʼamanaki ʼi te Tohi-Tapu. ʼE tufa e te kau Fakamoʼoni ʼa Sehova ia te ʼu tohi faka Tohi-Tapu moʼo tokoni kia nātou ʼaē ʼe ʼaoga ke tokoniʼi nātou ke nātou maʼu he fakaloto fīmālie mai te ʼAtua.