Te Maʼuhiga ʼo Te Lotoʼofa

“KO TE meʼa manakoʼia ʼo te tagata ʼaē neʼe toʼo mai te kele, ʼe ko tona lotoʼofa,” ko te ʼui ʼaia ʼa te Tohi-Tapu. (Tāʼaga Lea 19:22) ʼE moʼoni ko te ʼu gāue ʼaē ʼe fai ʼaki te ʼofa ʼe ko he ʼu gāue ʼe leleiʼia ʼaupito. Kae ʼi te Tohi-Tapu, ko te kupu “lotoʼofa” ʼe faka ʼuhiga ki te lotoʼofa ʼaē ʼe fai ki he tahi kua tou feʼiloʼiʼaki mo ia, ohage ko he felogoi ʼe fakatafito ki he lotoʼofa neʼe fai ʼi muʼa atu ki he tahi. Koia ʼe toe kau kiai te agatonu.

Neʼe mole fakahā e te Hau ko Seoasi te kalitate ʼaia. Neʼe tonu ke lahi tona loto fakafetaʼi ki tona mahikitaga pea mo Seoiata te ʼohoana ʼo tona mahikitaga. ʼI te mole heʼeki taʼu katoa ʼo Seoasi, ko tana kui fafine agakovi neʼe ina fakanofo ia ia totonu ke fineʼaliki, pea neʼe ina matehi te ʼu tēhina fuli ʼo Seoasi, ʼaē neʼe tonu ke nātou maʼu te tuʼulaga hau. Kae neʼe mole feala ke ina matehi te tamasiʼi muli, ko Seoasi, heʼe ko tona mahikitaga pea mo tona ʼohoana neʼe nā fufū fakalelei ia ia. Neʼe nā toe akoʼi kia ia te Lao ʼa te ʼAtua. ʼI te taʼu fitu ʼo Seoasi, neʼe fakaʼaogaʼi e Seoiata tona tuʼulaga pelepitelo lahi moʼo ina matehi te fineʼaliki agakovi, pea mo fakanofo hau ia Seoasi.—2 Fakamatala 22:10-23:15.

Ko Seoasi neʼe ko he hau agalelei ʼo aʼu ki te mate ʼo Seoiata, kae ki muli age neʼe kamata tauhi ki te ʼu tamapua. Neʼe fekauʼi e te ʼAtua ia Sakalia, te foha ʼo Seoiata, ke ina fakatokagaʼi kia Seoasi tana aga faka ʼapositasia. Neʼe fakatotonu e Seoasi ke tuki makaʼi ia Sakalia. Neʼe fakahā e te aga ʼaia ʼa Seoasi tana mole ʼofa agatonu ki te famili ʼaē neʼe nātou gaohi fakaleleiʼi ia ia!—2 Fakamatala 24:17-21.

ʼE ʼui fēnei e te Tohi-Tapu: “Ko Seoasi neʼe mole ina manatuʼi te lotoʼofa ʼaē neʼe fakahā age kia ia e [te] tāmai [ʼa Sakalia], kae neʼe ina matehi tona foha.” ʼI tana mate, neʼe ʼui fēnei e Sakalia: “Ke vakaʼi e Sehova te faʼahi ʼaia pea ke ina toe fakaʼui.” Neʼe hoko te ʼu palalau ʼa Sakalia, he neʼe liliu ia Seoasi ʼo mahaki kovi pea neʼe matehi ia ia e tana ʼu kaugana.—2 Fakamatala 24:17-25.

Ko nātou fuli ʼaē ka nātou mulimuli anai ki te tokoni ʼaē ʼe hoa mai, ʼe mole nātou mamate anai ohage ko te Hau ko Seoasi, kae ʼe nātou maʼu anai he ʼu tapuakina ʼi te ka haʼu: “Ke mole mavae ia te koe te lotoʼofa pea mo te moʼoni! . . . Pea ke ke maʼu ai te ʼofa . . . ia mata ʼo te ʼAtua pea mo te tagata kelekele.”—Tāʼaga Lea 3:3, 4.