Ko He Fakamatala Fakaofoofo

MAI te taʼu 1928 ki te taʼu 1956, neʼe folau tuʼa nima ki te Antarctique ia te tagata fai kumi ko Richard E. Byrd. Neʼe feala kia ia pea mo tana kau kaugā gāue ke nātou ʼiloʼi te mālohi ʼo te ʼu matagi, mo nātou fai he ʼu fakatuʼutuʼu, pea mo maʼu he ʼu tuʼuga meʼa ʼo ʼuhiga mo te Antarctique, he neʼe ʼi ai te tohi ʼe tuʼu ai te ʼu fakamatala totonu.

ʼE ʼasi mai ʼi te ʼu kumi ʼa Byrd, ʼe maʼuhiga ke tohi ki he kaupepa te ʼu meʼa ʼaē neʼe kita fai. ʼI he kaupepa faitohi, ʼe fakamatalatala ai te ʼu meʼa kehekehe neʼe hoko ʼi he folau. ʼE feala ki muli age ke toe fakaʼaogaʼi te ʼu fakamatala ʼaia peʼe vakavakaʼi te ʼu meʼa ʼaē ʼe feala ke fai ki te tahi ʼu folau.

ʼE fakahā mai e te Tohi-Tapu te fakamatala fakaofoofo ʼo ʼuhiga mo te Tulivio ʼi te temi ʼo Noe. Neʼe taʼu katoa vaelua te Tulivio faka malamanei ʼaia. ʼI tanatou teuteu ki te Tulivio, neʼe faʼu e Noe, mo tona ʼohoana, mo tona ʼu foha e toko tolu pea mo tonatou ʼu ʼohoana ia he aleka ia taʼu e 50 peʼe 60​—ko he foʼi vaka ʼe 40 000 meta kipi tona laulahi. He koʼe neʼe faʼu te aleka ʼaia? Moʼo hāofaki te hahaʼi pea mo te ʼu manu ʼi te Tulivio.​—Senesi 7⁠:​1-3.

ʼE tou maʼu ʼi te Tohi-Tapu, ʼi te tohi ʼo Senesi, ia te fakamatala kia Noe, ʼo ʼuhiga mo te ʼu meʼa ʼaē neʼe hoko mai te kamata ʼo te Tulivio ʼo aʼu ki te mavae ʼa Noe pea mo tona famili ʼi te aleka. ʼE ʼaoga koa kia tatou ia ʼaho nei te ʼu meʼa ʼaē ʼe tohi ai?