‘Ko Salomone Neʼe Mole Teuteu Feiā Ohage Ko Te ʼu Lilio ʼAia’
KO TE ʼu fisiʼi teu ohage ko te ʼu fisiʼi teu ʼo te paki ʼe lahi tanatou homo ʼi te ʼu ala ʼi te potu saute ʼo Afelika. ʼE fakahigoa ko te cosmos pea ʼe maʼu tāfito te ʼu fisiʼi teu ʼaia ʼi ʼihi fenua ʼo te potu saute ʼo Amelika. Ko te ʼu fisiʼi teu matalelei ʼaia ʼe lagi tou manatuʼi ai te ako neʼe fakahā e Sesu. Tokolahi te hahaʼi ʼaē neʼe fakalogo kia te ia neʼe māsisiva, pea neʼe nātou tuʼania ʼo ʼuhiga mo te ʼu meʼa ʼaē ʼe ʼaoga kia nātou ʼi te faʼahi fakasino, mo te meʼa kai pea mo te mutuʼi meʼa.
Neʼe fehuʼi fēnei e Sesu: “ ʼO ʼuhiga mo te meʼa kofu, koteā ʼaē ʼe koutou hoha ai? Koutou ako mai te ʼu lilio ʼo te ʼu gāueʼaga, pe ʼe feafeaʼi tanatou tupu ake; ʼe mole nātou gāue pea ʼe mole nātou fai filo; kaʼe ʼau tala atu kia koutou, māʼiape la mo Salomone, ʼi tona kolōlia katoa, neʼe mole feiā hona teu ke hage ko te teuteuʼi ʼo he lilio e tahi [ʼi te ʼu lilio ʼaia].”—Mateo 6:28, 29, MN.
Neʼe kehekehe te ʼu manatu ʼaē neʼe fai ʼo ʼuhiga mo te faʼahiga fisiʼi teu ʼaē neʼe talanoa kiai Sesu. Kae neʼe fakatatau leva e Sesu te fisiʼi teu ʼaia mo te vao, ʼo ʼui maʼana: “Koia kapau ʼe teuteuʼi feiāʼi e te ʼAtua ia te vao ʼo te fenua, ʼaē ʼe tuʼu ʼi te ʼaho nei, pea laku ia ʼapogipogi ki te gutuʼumu, ʼe mole koa la lahi ake anai hana teuteuʼi koutou, hahaʼi tui vaivai?”—Mateo 6:30, MN.
Logola ʼe mole maʼu tāfito te fisiʼi teu ʼaē ko te cosmos ʼi Iselaele, kae ʼe mahino ia ʼe nātou lagolago ki te ako ʼaē neʼe fakahā e Sesu. Tatau aipe peʼe tou sio mai mamaʼo peʼe tou vakaʼi lelei te ʼu fisiʼi teu ʼaia, kae ʼe nātou matalelei ʼaupito pea ʼe paki e te ʼu hahaʼi fai paki. ʼE moʼoni, neʼe mole loi ia Sesu ʼi tana ʼui fēnei ʼaē, “māʼiape la mo Salomone, ʼi tona kolōlia katoa, neʼe mole feiā hona teu ke hage ko te teuteuʼi ʼo he lilio e tahi [ʼi te ʼu lilio ʼaia].”
Koteā te ako maʼa tatou ia ʼaho nei? Ko nātou ʼaē ʼe nātou tauhi ki te ʼAtua ʼe feala ke nātou tui papau ʼe tokoni anai te ʼAtua kia nātou ke nātou maʼu te ʼu meʼa ʼaē ʼe ʼaoga ki te maʼuli, māʼia pe la ʼi te ʼu temi faigataʼa. Neʼe fakamahino fēnei e Sesu: “Koutou haga kumi [te] puleʼaga [ʼo te ʼAtua], pea ko te ʼu meʼa fuli ʼaia [ohage ko te meʼa kai pea mo te mutuʼi meʼa] ʼe toe foaki atu anai kia koutou.” (Luka 12:31, MN ) Ei, ʼe tou maʼu te ʼu lelei moʼoni mo kapau ʼe tou kumi te Puleʼaga ʼo te ʼAtua. Kae ʼe koutou ʼiloʼi koa pe koteā te Puleʼaga ʼo te ʼAtua pea koteā ʼaē ka ina fai anai maʼa te malamanei? ʼE fiafia anai te kau Fakamoʼoni ʼa Sehova ʼi hanatou tokoni atu ke koutou maʼu te ʼu tali kiai ʼi te Tohi-Tapu.