Ko He Foʼi Fime Viteo Neʼe Fai Ke Malave ʼi Te Loto ʼo Te Kau Tūpulaga

KAUGAMĀLIE te kau tūpulaga neʼe fakaloto mālohiʼi fakalelei ke nātou vakavakaʼi tanatou aga mokā nātou sisio anai ki te foʼi fime viteo Les jeunes sʼinterrogent... Comment se faire de vrais amis ? a ʼE maʼu ʼi te foʼi fime viteo ʼaia ia te ʼu tokoni faka Tohi-Tapu, mo he ʼu fakamatala ʼa he kau Kilisitiano tūpulaga, pea mo he gaoʼi ʼe fakatafito ki te fakamatala faka Tohi-Tapu ʼo Tina. (Senesi, kapite 34) Ko te ʼu fakamatala ʼe hoa mai ʼo ʼuhiga mo te foʼi fime viteo ʼe maʼu mai Mekesike.

ʼE fakamatala fēnei e Martha: “Neʼe malave ʼaupito te foʼi fime viteo ʼi toku loto. Neʼe hage ia neʼe fai tāfito te foʼi ʼata ʼaia maʼa ʼaku. Neʼe ʼau manatu neʼe feʼauga pe taku fakahā ki taku kau faiako mo toku ʼu kaugā ako ke nātou ʼiloʼi ko ʼau ko te Fakamoʼoni ʼa Sehova. Kae neʼe mole ʼau fakamoʼoni ki te faʼahi ʼaia ʼo ʼau fagonogono age kia nātou. ʼE ʼau fakafetaʼi ki te ʼu logo fuli ʼe foaki mai e Sehova, tāfito la mokā ʼe ko he ʼu faʼahi ʼe malave mālohi ia tatou ohage ko tona fakahā e te foʼi fime viteo ʼaia.”

ʼE ʼui fēnei e Juan Carlos: “Ko te foʼi fime viteo ʼaia ʼe ina fakaʼala moʼoni takita fakakaukau. ʼI taku kei ʼeva, neʼe ʼi ai te ʼu hala neʼe ʼau fai pea neʼe tatau mo te ʼu aga ʼa ʼihi neʼe gaoʼi ʼi te ʼata. Neʼe ʼi ai te ʼu taʼu, neʼe ʼau maʼuli lua ai, kae neʼe ʼau mahino ko te faʼahiga maʼuli ʼaia ʼe ʼi ai mo tona ʼu ikuʼaga mamafa. ʼI taku ʼosi sioʼi te foʼi fime viteo, neʼe ʼau fakatotonu ai ke ʼau agatonu kia Sehova.”

ʼE fakamoʼoni fēnei e Sulem: “ ʼI taku sioʼi te foʼi fime viteo, neʼe malave ʼi toku loto. ʼI muʼa atu, neʼe kua ʼau tuku taku ako te Tohi-Tapu, pea neʼe mole lahi haku faikole kia Sehova. ʼI taku logo ki te ʼu fakamatala ʼa te kau tūpulaga ʼi te foʼi fime viteo, neʼe ʼekenaki ʼau ke ʼau toe toʼo taku ako Tohi-Tapu pea mo ʼau toe faikole kia Sehova.”

ʼE lahi te ʼu faigataʼaʼia ʼe tau mo te kau tūpulaga ʼi te temi nei, pea ko te ʼu kaumeʼa ʼe nātou filifili ʼe feala pe ke ina fetogi lahi ai tonatou maʼuli. (Pesalemo 26⁠:4; Tāʼaga Lea 13⁠:20) Ko te foʼi fime viteo Les jeunes sʼinterrogent... Comment se faire de vrais amis ? ʼe tokoni ki te tokolahi ke nātou fai he ʼu tonu ʼe lelei ʼi te faʼahi ʼaia.

[Kiʼi nota]