He Fakafimālie Kia Nātou ʼe Pāui Ke Tokoni Age
KO TE Tohi-Tapu ʼe mole ko he tohi ki te ʼu mahaki loto. Kae ʼe ina fakafimālieʼi tatou pea mo tokoni mai kia tatou ke tou faka maʼuhigaʼi te maʼuli, logope te ʼu faigataʼaʼia ʼe tau mo tatou. ʼE tala tonu e te Tohi-Tapu: “Ko te tagata, ʼaē neʼe tupu mai te fafine, ʼe nounou tona maʼuli pea ʼe fonu ʼi te lotohoha.” (Sopo 14:1) Ko ʼihi faigataʼaʼia ʼa tatou ʼe tupu mai totatou ʼuhiga agahala. Kae ko ai koa ʼaē ʼe tupu tāfito ai te ʼu mamahi ʼo te tagata?
ʼE fakahā mai e te Tohi-Tapu, ʼe ko te laumālie ʼe higoa ko Tevolo mo Satana. ʼE ina “fakahēʼi te kele katoa” pea mo fakatupu te ʼu tuʼuga malaʼia ki te malamanei. Kae ʼe toe ʼui mai pe foki e te Tohi-Tapu kua nounou tona temi. (Apokalipesi 12:9, 12, MN ) Kua vave pulihi e te ʼAtua ia te ʼu mamahi fuli ʼaē neʼe fakatupu e Satana ki te hahaʼi ʼo te kele. ʼE ʼui e te Tohi-Tapu, ʼe pulihi anai te heʼe ʼamanaki ʼi te mālama foʼou ʼaē neʼe fakapapauʼi mai e te ʼAtua.—2 Petelo 3:13.
Ko he meʼa fakaloto fīmālie takita ʼiloʼi ʼe faka temi pe te ʼu mamahi ʼa te tagata! ʼAki te takitaki ʼo te Puleʼaga ʼo te ʼAtua ʼi selo e Sesu Kilisito, ʼe pulihi anai te heʼe faitotonu pea mo te mamahi. ʼO ʼuhiga mo te hau ʼaē neʼe fakanofo e te ʼAtua, ʼe ʼui fēnei e te Tohi-Tapu: “ ʼE ina hāofaki anai te masiva ʼaē ʼe pāui ke tokoni age ki ai, ʼo toe feiā mo ia ʼaē ʼe lotomamahi pea mo ia ʼaē ʼe mole he tahi ke tokoni age ki ai. ʼE fakaʼofaʼofa anai kia ia ʼaē ʼe veliveli pea mo ʼaē ʼe masiva, pea ʼe ina hāofaki anai te ʼu nefesi ʼo te kau masiva. Mai te taʼomia pea mo te agamālohi ʼe ina totogi anai tonatou ʼu nefesi, pea ʼe maʼuhiga anai tonatou loto ki ʼona mata.”—Pesalemo 72:12-14.
Kua ōvi mai te temi ʼaē ka fakahoko ai te ʼu lea faka polofeta ʼaia. ʼE tou lava fakafiafia anai ki te maʼuli heʼegata ʼi he palatiso ʼi te kele ʼi he ʼu ʼaluʼaga fakaofoofo. (Luka 23:43; Soane 17:3) ʼE maʼu he loto falala pea mo he fakafimālie, e nātou ʼaē ʼe pāui ke tokoni age, ʼaki tanatou ʼiloʼi te ʼu fakapapau fakaloto fīmālie ʼaia ʼe maʼu ʼi te Tohi-Tapu.
[Haʼuʼaga ʼo te paki]
Depressed girl: Photo ILO/J. Maillard