“Ko Te ʼu Fafine e Lua Neʼe Nā Fisifisi Ki Tomā Matapā”

“KUA hili nei taʼu e lua ʼo te mate ʼo tamā kiʼi taʼahine ʼofaina.” Neʼe kamata feiā te tohi neʼe tā ʼi te nusipepa Le Progrès, ʼi Saint-Étienne, ʼi Falani.

“Neʼe māhina tolu ia Mélissa pea neʼe ina maʼu te mahaki kovi ʼaē ko te trisomie 18. ʼE mole feala ke kita galoʼi te taʼi meʼa ʼaia, heʼe mole ko he agatonu ia. Logope neʼe ma tutupu ake ʼi te Lotu Katolika, kae ʼi te taʼi lakaga ʼaia neʼe ma feʼekeʼaki fēnei, ‘ ʼAtua, kapau ʼe ke maʼuli, he koʼe koa ʼe ke fakagafua ke hoko te ʼu taʼi meʼa ʼaia?’ ” ʼE ʼiloga ia, ko te faʼe ʼaē neʼe ina fai te tohi ʼaia neʼe mamahi ʼaupito tona loto pea neʼe hage neʼe mole kei ʼi ai hana ʼamanaki. ʼE toe hoko atu fēnei te tohi:

“Mole faʼa fualoa ki te hili ʼo te mate ʼo tamā kiʼi taʼahine, mo te fisifisi mai ʼo tomā matapā e te toko lua. Neʼe ʼau ʼiloʼi atu aipe ko te ʼu Fakamoʼoni ʼa Sehova. Neʼe ʼau ʼamanaki ʼui age ke nā ʼolo, kae neʼe ʼau fakatokagaʼi te kaupepa neʼe nā fakahā mai. Neʼe ko te nusipepa ʼo ʼuhiga mo te tupuʼaga ʼo te fakagafua e te ʼAtua ia te ʼu mamahi. Pea neʼe ʼau tali ai ia nāua, ʼaki te manatu ʼaē, ʼe ʼau fakamoʼoni age anai kia nāua ʼe nā faihala. ʼI taku manatu, neʼe feʼauga te mamahi ʼaē neʼe tau mo toku famili, pea neʼe mole ʼau toe fia logo ki te ʼu palalau māhani ʼaē ʼe nātou ʼui: ‘Neʼe foaki mai e te ʼAtua, pea kua ina toe toʼo.’ Neʼe nonofo te ʼu Fakamoʼoni ʼo laka ʼi te hola katoa. ʼAki he agaʼofa lahi, neʼe nā nonofo ʼo fakalogo ki taku ʼu palalau, pea ʼi te temi ʼaē neʼe nā mavae ai, neʼe kua ʼau logo fīmālie, pea koia ʼaē neʼe ʼau tali ai ke nā toe ʼōmai. Neʼe hoko te faʼahi ʼaia kua hili kiai taʼu e lua. ʼE mole heʼeki ʼau liliu ko he Fakamoʼoni ʼa Sehova, kae kua ʼau kamata ako te Tohi-Tapu mo nātou, pea ʼe ʼau kau ki tanatou ʼu fono ʼo mulimuli ki toku fealagia.”