Ko Te Tauhi Moʼoni ʼe Ina Fakatahiʼi Te Famili

ʼI TE temi ʼaē neʼe logo ai ia Maria mo tona tēhina veliveli ko Lucy ki tanā faʼe tagata neʼe palalau age ʼo ʼuhiga mo Sehova pea mo fakamahino age te ʼamanaki ʼo he Palatiso ʼi te kele, neʼe ko te taʼu 13 ʼaia ʼo Maria. ʼI tanā fia ʼiloʼi te faʼahi ʼaia, neʼe nā ʼolo mo tonā kāiga ki te Fale ʼo Te Puleʼaga ʼo te kau Fakamoʼoni ʼa Sehova. Neʼe malave kia Maria ia te fakamahino lelei ʼaē ʼe maʼu ai. Neʼe kehekehe ia mo te ʼēkelesia, ʼaē neʼe lahi pe ko te hiva ʼi ai! Mole tuai pea neʼe nā ako te Tohi-Tapu mo te Fakamoʼoni ʼa Sehova.

Ko tonā tuagaʼane lahi ko Hugo, neʼe fia fai ki te filosofia pea mo te evolisio. Neʼe ina lau ko ia ʼe mole tui ki te ʼAtua. Kae lolotoga tona temi solia, neʼe ina lau te tohi La vie : comment est-elle apparue ? Évolution ou création ? a Neʼe ina maʼu ai te ʼu tali ki te ʼu fehuʼi, ʼe mole maʼu e he tahi atu lotu. ʼI te ʼosi ʼo tona temi solia, neʼe ina kamata fakamālohi tana tui foʼou ki te ʼAtua, ʼo ako te Tohi-Tapu pea mo kau ki te ʼu fono mo tona ʼu tuagaʼane. Ko Maria mo Lucy neʼe nā papitema ʼi te taʼu 1992, hili te ʼu taʼu e lua ʼo tanā logo ki te moʼoni, pea ko tonā tuagaʼane lahi, neʼe papitema hili kiai te ʼu taʼu e lua.

ʼI te temi ʼaia, ko tanatou ʼu mātuʼa, ʼaē neʼe tauhi lelei ki te Lotu Katolika, neʼe mole faʼa tokaga ki te moʼoni faka Tohi-Tapu. Maʼa nāua ʼe fakapiko te kau Fakamoʼoni ʼa Sehova, logola ʼe nā tokagaʼi te ʼu aga lelei pea mo te ʼu teu fakaʼapaʼapa ʼo te kau tūpulaga Fakamoʼoni ʼaē neʼe fakaafe e tanā ʼu fānau ki tonatou ʼapi. Pea ʼi te tahi lakaga lolotoga tanatou kakai, neʼe palalau te ʼu tamaliki ki te ʼu meʼa ʼaē neʼe nātou ako ʼi te fono, pea neʼe fakatupu ai te fia logo ʼa te ʼu mātuʼa.

Kae ko te ʼu mātuʼa neʼe nā leleiʼia te ʼu meʼa fakatemonio. Ko te tāmai neʼe ko te tagata ʼinu kava pea neʼe ina tā tanatou faʼe. Neʼe kua ʼamanaki mavete te famili. Ko te tāmai neʼe pilisoni vāhaʼa lua koteʼuhi ko tana aga maveuveu tupu pe ko tana ʼinu. Lolotoga tona pilisoniʼi, neʼe ina kamata lau te Tohi-Tapu. Neʼe ina tokagaʼi ʼi tana lautohi ia te ʼu palalau ʼa Sesu ʼo ʼuhiga mo te fakaʼiloga ʼo te ʼaho fakamuli. Neʼe lahi ai te ʼu fehuʼi neʼe nā fakakaukauʼi, pea neʼe nā ʼolo ki te Fale ʼo Te Puleʼaga, pea mo nā tali ke fai hana ako Tohi-Tapu. ʼI tanā akoʼi te moʼoni, neʼe nā maumauʼi fuli tanā ʼu tohi ʼo ʼuhiga mo te ʼu meʼa fakatemonio, pea mo nā ʼāteaina ai mai tonā ʼu gaohi e te ʼu temonio, ʼaki tanā fetapa ki te huafa ʼo Sehova. Neʼe nā fai ai te ʼu fetogi maʼuhiga ʼi tonā ʼu ʼulugaaga.

Koutou fakakaukauʼi age muʼa te fiafia ʼa Maria mo Lucy ʼi tanā sisio ki tanā ʼu mātuʼa ʼe papitemaʼi e Hugo ʼi te fakatahi faka tisitilike ʼi Bolivie ʼi te taʼu 1999! Neʼe hoki hili te ʼu taʼu e hiva ki te kamata logo ʼa Maria mo Lucy ki te palalau ʼo ʼuhiga mo Sehova mo tana ʼu fakapapau. ʼI te temi nei, ko nāua mo Hugo kua nātou pionie. Ko he meʼa fakafiafia ʼo te fakatahiʼi ʼo tonatou famili e te tauhi moʼoni!

[Kiʼi nota]