Ka Hoko Moʼoni Anai Te ʼu Fakapapau

ʼI TE hisitolia ʼo te malamanei, ʼe lahi te ʼu fakapapau neʼe holoʼi. Ko te meʼa ʼaē neʼe tau hoko, ko te ʼu puleʼaga neʼe mole nātou mulimuli ki te ʼu fakapapau ʼaē neʼe nātou sinie, ʼe mole nātou fakaʼaogaʼi anai te agamālohi ki he tahi ʼu fenua, ke ʼaua naʼa kau tanatou ʼu hahaʼi ki he ʼu tau fakamataku. Neʼe fakatokagaʼi fēnei e Napoléon: “ ʼE mulimuli pe te ʼu puleʼaga ki tanatou ʼu fakapapau mokā ʼe fakakinauʼi nātou ke nātou fai te faʼahi ʼaia, peʼe mokā ʼe to lelei kia nātou.”

Kae e feafeaʼi ki te ʼu fakapapau ʼaē ʼe fai e te hahaʼi? Ko he meʼa fakaloto mamahi mokā ʼe mole fakahoko he fakapapau ʼa he tahi! Tāfito la mo kapau ko he tahi ʼe koutou ʼiloʼi pea mo koutou falala ki ai. ʼE mahino mai ia, ʼe lagi mole fakahoko te ʼu fakapapau e te hahaʼi koteʼuhi ʼe mole nātou lavaʼi peʼe mole nātou loto kiai.

ʼE kehekehe ʼaupito te ʼu fakapapau ʼa te tagata mai te ʼu fakapapau ʼa te ʼAtua! ʼE feala hatatou falala katoa ki te ʼu fakapapau ʼe fai e te ʼAtua. Koteʼuhi ko te ʼu fakapapau fuli ʼaē ʼe fai e Sehova ʼAtua ʼe ko he ʼu palalau moʼoni ia. ʼE feala hatatou tui papau ʼe hoko anai ia. ʼO ʼuhiga mo te hoko moʼoni ʼa te ʼu folafola ʼa te ʼAtua, ʼe tala fēnei e Isaia 55⁠:11: “ ʼE feiā anai taku folafola ʼaē ʼe mavae atu ʼi toku gutu. ʼE mole toe liliu mai anai kia te ʼau ka mole hona ʼu fua, kae ʼe mahino papau ia ʼe ina fai anai te meʼa ʼaē kua ʼau leleiʼia, pea ʼe lava lelei anai te meʼa ʼaē neʼe ʼau fekauʼi ki ai.”

Koia ʼe tonu ke feafeaʼi tatatou tokagaʼi te ʼu fakapapau ʼa te ʼAtua ʼaē ʼe fakamatala ʼi te Tohi-Tapu? ʼE feala hatatou tui papau kiai. Ohage foki la, neʼe tohi fēnei e te ʼapositolo ko Soane: “Koʼeni! Ko te fale fehikitaki ʼo te ʼAtua ʼe nofo mo te hahaʼi, pea ʼe nofo anai mo nātou, pea ʼe nātou liliu anai ko tana ʼu hahaʼi. Pea ko te ʼAtua totonu ʼe nofo anai mo nātou. Pea ʼe ina holoholoʼi anai te ʼu loʼimata fuli pe ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he kekē, he mamahi. Ko te ʼu meʼa ʼāfea kua puli ia.” (Apokalipesi 21⁠:​3, 4, MN ) ʼE feala ke koutou maʼu te ʼu tapuakina ʼaia mo kapau ʼe ʼalutahi tokotou maʼuli mo te ʼu palalau ʼaenī ʼa Sesu: “Ko te faka ʼuhiga ʼaenī ʼo te maʼuli heʼegata, ke nātou ako te ʼiloʼi ʼo koe, te ʼAtua moʼoni pe ʼaē e tahi, pea mo ia ʼaē neʼe ke fekauʼi mai, ia Sesu Kilisito.”​—Soane 17⁠:​3, MN.