Te ʼu Fehuʼi ʼa Te Kau Lautohi
Ko ai koa ʼaē neʼe palalau ki ai ia Sehova ʼi tana ʼui ia Senesi 3:22 ko “he tahi ia tāua”?
ʼE ʼiloga mai ko te ʼu palalau ʼaia, neʼe fai e Sehova ʼAtua kia ia totonu pea mo tona ʼAlo ʼulu tokotahi ʼi tana ʼui fēnei: “Kua hage te tagata ko he tahi ia tāua, ʼo ina ʼiloʼi te lelei pea mo te kovi.” (Senesi 3:22) Tou vakaʼi pe koʼe ʼe tou fakamahino feiā.
Neʼe fai e Sehova ia te ʼu palalau ʼaia ʼi tana ʼosi tauteaʼi ia te ʼuluaki taumatuʼa. Ko ʼihi ʼe nātou lau ko te ʼu kupuʼi palalau “he tahi ia tāua” ʼe ko he ʼu palalau ʼa he hau. Kae ʼo ʼuhiga mo Senesi 1:26 pea mo 3:22, ʼe ʼui fēnei e te tagata sivi Tohi-Tapu ko Donald E. Gowan: “ ʼE mole ʼi ai he fakamoʼoni ʼi te Tauhi ʼĀfea ʼo ʼuhiga mo te ʼu fakamahino ʼaia: te fakaʼaogaʼi ʼo te kupu ‘tāua’ moʼo faka ʼuhiga ʼe ko he ʼu palalau ʼa he hau, peʼe ko te filifili pe ʼaē ke fakaʼaogaʼi ia te kupuʼi palalau ʼaia ko ‘tāua,’ peʼe ko te fia faka maʼuhigaʼi ʼo te kaugamālie, peʼe ko he fakahā ʼo te kaugamālie ʼo nātou ʼe nātou faʼufaʼu te tuʼulaga ʼAtua. . . . ʼI te ʼu fakamahino ʼaia, ʼe mole ʼi ai he tahi ʼe ina fakamatalatala lelei ia [Senesi] 3:22, ʼaē ʼe palalau ai ki ‘he tahi ia tāua.’ ”
Neʼe feala ʼapē ke palalau ia Sehova kia Satana te Tevolo, ʼaē neʼe kua kamata filifili e ia totonu ia “te lelei pea mo te kovi”, mo ina fakalotoʼi te ʼuluaki taumatuʼa ke nā fai ohage ko ia? ʼE mole feala ia ke tou ʼui neʼe palalau ia Sehova kia Satana. ʼI henī neʼe fakaʼaogaʼi e Sehova ia te ʼu kupuʼi palalau “he tahi ia tāua.” Neʼe mole kei kau ia Satana ki te kau ʼaselo agatonu ʼa Sehova, koia neʼe mole feala ia ke kau kia nātou ʼaē neʼe ia tafa ʼo Sehova.
Neʼe palalau koa te ʼAtua ki te kau ʼaselo agatonu? ʼE mole feala ke tou ʼui papau he koga feiā. Kae ʼe feala ke tou maʼu he manatu lelei mai te ʼu kupuʼi palalau ʼaē ʼe teitei tatau tona fakaʼaogaʼi ia Senesi 1:26 pea mo 3:22. Ia Senesi 1:26, ʼe tohi fēnei ai te ʼu palalau ʼa Sehova: “Ta fai te tagata ki tota paki, ke hoko kia tāua.” Neʼe ina fai tana ʼu palalau ʼaia kia ai? ʼI tana palalau ki te laumālie ʼaē neʼe liliu ko te tagata haohaoa ko Sesu, neʼe ʼui fēnei e te ʼapositolo ko Paulo: “Ko ia te paki ʼo te ʼAtua fakapulipuli, te ʼuluaki-tupu ʼo te ʼu meʼa fuli ʼaē neʼe fakatupu; koteʼuhi ʼaki ia ia neʼe fakatupu ia meʼa fuape ʼi te lagi pea mo te kele.” (Kolose 1:15, 16, MN ) ʼE matatonu age te ʼui ʼo ʼuhiga mo Senesi 1:26, ko Sehova neʼe palalau ki tona ʼAlo ʼulu tokotahi, te “tufuga faiva,” ʼaē neʼe nofo ʼi ʼona tafa lolotoga te fakatupu ʼo te lagi pea mo te kele. (Tāʼaga Lea 8:22-31) Ko te kupuʼi palalau ʼaia ʼaē ʼe toe maʼu ia Senesi 3:22, ʼe ina fia fakahā mai ko Sehova neʼe toe palalau kia ia ʼaē neʼe ōvi age kia te ia, tona ʼAlo ʼulu tokotahi.
ʼE ʼiloga mai neʼe maʼu e te ʼAlo ʼulu tokotahi ʼo te ʼAtua ia te ʼiloʼi ʼo “te lelei mo te kovi.” ʼAki tana nofo fualoa pea mo ōvi kia Sehova, ʼe mahino ia kua ina ʼiloʼi katoa te manatu ʼo tana Tāmai, mo tana ʼu pelesepeto pea mo tana ʼu lekula. ʼI te kua ʼiloʼi papau e Sehova te mālama ʼo tona ʼAlo ki te ʼu faʼahi ʼaia pea mo tana agatonu kiai, koia neʼe tuku age ai e Sehova he faʼahiga gāue faʼitaliha ki te fakaʼaluʼalu ʼo te ʼu meʼa, kae mole ina fakalavelave tuʼumaʼu age ki ai ki he faʼahiga meʼa pe ʼe tonu ke fai. Neʼe feala pea neʼe fakagafua age ki te ʼAlo, ke ina filifili te lelei pea mo te kovi. Kae neʼe mole hage ia ko Satana, mo Atama, pea mo Eva, neʼe mole ina fakatuʼutuʼu e ia totonu ia te lelei mo te kovi, ke fakafeagai ki te fakatuʼutuʼu ʼa Sehova.