“Kua ʼAu Maʼu Te ʼu Kaumeʼa, Te ʼu Hahaʼi ʼe ʼOʼofa Pea Mo Loto Tokaga”

“AKI te mea aia, e iloi anai e te tagata fuape, ko koutou ko aku tisipulo, [mo] kapau e koutou maù te feʼofaʼofani.” (Soane 13:35) Ohage ko tona ʼui e Sesu, neʼe liliu te ʼofa ko te fakaʼiloga ʼaia ʼo te kau ʼuluaki Kilisitiano. Ko Tertullien, ʼaē neʼe faitohi hili kiai taʼu e teau ʼi te ʼosi mate ʼo Sesu, neʼe talanoa ki te ʼu palalau ʼaenī neʼe fai e te hahaʼi: ‘Koutou sio ki tanatou feʼofani pea ʼe nātou tali ke nātou mate maʼa tonatou ʼu tēhina.’

ʼE kei maʼu koa te taʼi ʼofa ʼaia ʼi te malamanei? Ei. Ohage ko tona fakahā e te tohi neʼe momoli ki te filiale ʼa te kau Fakamoʼoni ʼa Sehova ʼi Pelesile. Ko te fafine ko Marília, neʼe ina tohi fēnei:

“ ʼI taku maʼuli ʼi te kolo ʼo Villa Mercedes, ʼi Alasatine, ko taku faʼe, ʼaē ko te Fakamoʼoni ʼa Sehova, neʼe ina maʼu te mahaki ʼaē ko te ostéoarthrite, pea neʼe palalisia ai mai tona kogaloto ʼo aʼu ki tona ʼu vaʼe. ʼI te ʼu ʼuluaki māhina e valu ʼo tana mahaki, ko te kau Fakamoʼoni ʼa Sehova ʼo Villa Mercedes, neʼe nātou fakahā tonatou ʼofa, ʼo nātou tokakaga fakalelei kia ia. Neʼe nātou fai ia meʼa fuli, te fakamaʼa ʼo te loto fale pea mo te teuteuʼi ʼo tana meʼa kai. Māʼiape la mo tana tuku ʼaē ʼi te lopitali, neʼe nofo tuʼumaʼu pe he tahi mo Mama ʼi te uhu pea mo te pōʼuli.

“Pea neʼe ma toe liliu leva mo Mama ki Pelesile, ʼaē ʼe kei mālōlō ai. Ko te kau Fakamoʼoni ʼo te koga meʼa ʼaē ʼe ma nonofo ai nei, ʼe nātou tokoni lahi ke toe lelei ia Mama.”

ʼE fakaʼosi fēnei e Marília tana tohi: “ ʼE moʼoni ʼe mole ʼau kau ʼi te kau Fakamoʼoni, kae kua ʼau maʼu te ʼu kaumeʼa, he ʼu hahaʼi ʼe ʼoʼofa pea mo loto tokaga.”

ʼE moʼoni, ʼe kei ʼi ai te ʼu hahaʼi ʼe nātou maʼu te ʼofa faka Kilisitiano moʼoni. ʼI tanatou fai ʼaia, ʼe nātou fakahā ai te mālohi ʼo te ʼu akonaki ʼa Sesu ʼaē ʼe feala ke malave ki totatou maʼuli.