He Leʼo ʼo Loto ʼe Maʼa

ʼI TE tahi ʼaho, ʼi tana liliu mai tana gāue ʼi te univelesitē ʼi Kenia, neʼe puli te telefoni feʼāveʼaki ʼa Charles. Kae ʼi Kenia, ʼe totogi kovi te taʼi telefoni ʼaia.

Neʼe ʼui fēnei e Charles: “Neʼe mole ʼau ʼamanaki ʼe ʼau toe maʼu anai.” Kae hili kiai ni ʼaho, neʼe punamaʼuli ʼi te telefoni age ʼa te filiale ʼa te kau Fakamoʼoni ʼa Sehova ʼo Kenia, neʼe kole ai ke ʼalu age ʼo kumi mai tana telefoni feʼāveʼaki. Ko te tagata Fakamoʼoni ʼa Sehova, ʼe kau ʼi te selevisi temi katoa, neʼe heka fakatahi mo Charles ʼi te motokā, pea neʼe ina maʼu te telefoni. Neʼe ina fia ʼiloʼi peʼe ʼa ai te telefoni, ʼo ina ʼave ai ki te filiale, pea ʼaki te ʼu numelo telefoni ʼaē ʼe tuʼu ai, neʼe maʼu e te kau gāue ʼo te fale ʼaia ia Charles.

Neʼe faitohi ia Charles ki te filiale ʼo ina ʼui fēnei: “ ʼE ʼau fakafetaʼi ʼaupito ki takotou ʼu faiga, logola neʼe faigataʼa. ʼE ʼau fia fakamālo ʼaupito kia nātou ʼaē ʼe kau ki takotou kautahi, ʼaē neʼe nātou maʼu te telefoni, mo nātou kumi pea mo maʼu ʼau pea mo nātou liufaki mai. Ia ʼaho nei, ʼe faigataʼa hakita maʼu he tahi ʼe aga fakahagatonu, kae ʼe ko he meʼa fakaloto mālohi hakita maʼu he ʼu hahaʼi tokosiʼi feiā, ohage ko te kau Fakamoʼoni ʼa te ʼAtua ko Sehova.”

ʼI te malamanei katoa, kua ʼiloʼi e te hahaʼi ko te kau Fakamoʼoni ʼa Sehova, ʼe ko he ʼu hahaʼi aga fakahagatonu. ʼE nātou faʼifaʼitakiʼi te ʼapositolo ko Paulo, ʼaē neʼe ina ʼui fēnei: “[ʼE] mātou ʼiloʼi papau, ʼe totonu tomatou leʼo ʼo loto, ʼe mātou loto ke mātou aga fakahagatonu ia meʼa fuape.” (Hepeleo 13⁠:​18, MN; 1 Kolonito 11⁠:⁠1) Kua mahino kia nātou, ko tanatou aga fakahagatonu ʼaia ʼe ina faka kolōlia ia Sehova ʼAtua, ohage ko te meʼa ʼaē neʼe ʼui e Sesu: “[Ke] mū . . . tokotou mālama ʼi muʼa ʼo te hahaʼi, koteʼuhi ke nātou mamata ki ʼakotou gāue lelei pea nātou faka kolōlia ai ki takotou Tāmai ʼaē ʼe ʼi selo.”​—Mateo 5:​16, MN.