“ ʼE Ma Fia ‘ ʼIo’ Age Ki Ai”

MOLE heʼeki faʼa fualoa neʼe maʼu e te pilō ʼo te kau Fakamoʼoni ʼa Sehova ʼi Niselia ia te tohi neʼe fai ai te ʼu palalau ʼaenī:

“Neʼe mate tamā tama ko Anderson ʼi tona taʼu 14. ʼI muʼa ʼo tona mate, neʼe ina taupau te ʼu moa e lua. Neʼe ina fia fakatau te ʼu moa pea mo momoli atu te falā ʼo te fakatau ko hona meʼa ʼofa ki te gāue fai faka mafola ʼaē ʼe fai ʼi te malamanei katoa. Kae neʼe mate ʼi muʼa ʼo te fakatau ʼo te ʼu moa.

“ ʼI tamā ʼiloʼi tana manatu ʼaia, ko māua tana ʼu mātuʼa, neʼe ma taupau te ʼu moa pea ma fakatau. ʼE ma momoli atu te falā ʼaē ko te meʼa ʼofa ʼo Anderson. ʼAki te fakapapau ʼa Sehova, ʼe ma falala kua vave pe anai tamatou toe fesioʼaki mo Anderson. Ka ina fehuʼi mai anai peʼe neʼe ma fakahoko te meʼa ʼaē neʼe loto kiai, ʼe ma fia ‘ ʼio’ age ki ai. Ei, ʼe ma fakatalitali ke ma sisio kia Anderson, kae ʼo toe feiā pe foki ke ma toe sisio mo te ‘ ʼao lahi ʼo te kau fakamoʼoni’ ʼaē ka fakatuʼuake anai.”​—Hepeleo 12:1; Soane 5:​28, 29.

Ohage ko tona hā lelei ʼi te tohi, ko te tui ki te fakatuʼuake ʼe ko he ʼamanaki ʼe ina fakaloto mālohiʼi te kau Kilisitiano moʼoni. Ko he meʼa fakafiafia anai ki te ʼu famili, ohage ko te famili ʼo Anderson, hanatou fakatalitali ki te toe tuʼu ake ʼo te hahaʼi ʼaē neʼe nātou ʼoʼofa mamahi ki ai mai te mate!​—1 Kolonito 15:24-​26.

ʼE tuʼu ʼi te Folafola ʼa te ʼAtua ia te ʼamanaki fakaloto mālohi ʼaia ʼo te fakatuʼuake, ʼaē ʼe kau ki te ʼu meʼa taulekaleka ʼaē ka fakahoko anai ʼi te mālama foʼou faitotonu ʼaē ka takitaki e te Puleʼaga ʼo te ʼAtua. (2 Petelo 3:​13) ʼO ʼuhiga mo te meʼa ʼaē ka fai anai e te ʼAtua maʼa te hahaʼi, ʼe ʼui fēnei e te Tohi-Tapu: “E ina holoholo anai ia loimata fuape i onatou fofoga, pea e mole toe mau anai te mate. E mole toe mau anai he putu, pe ko he lauga, pe ko he mamahi, koteuhi kua puli te malama-nei afea.”​—Apokalipesi 21:4.