“ ʼE Lelei Ke Ke Fai Te Meʼa ʼAia”

KO Alexis ʼe ko te kiʼi tamasiʼi tagata ʼe taʼu nima ʼe nofo ʼi te kolo ko Morelia, ʼi Mekesike, pea ko tanā ʼu mātuʼa ʼe nā ako te Tohi-Tapu pea mo nā kau ki te ʼu fono ʼa te kau Fakamoʼoni ʼa Sehova. ʼI tanatou kau ki te fakatahi faka silikosikilipisio, neʼe sio ki te faʼifaʼitaki ʼo ʼuhiga mo te fai faka mafola ʼi te ʼu ʼapi. Neʼe haga atu aipe ki tana tāmai pea mo fehuʼi age, “Papa, Papa, he koʼe ʼe mole ke fai faka mafola?” Pea tali age e tana tāmai, “ ʼE kei ʼau ako ke feala haku kau ki te gāue ʼaia.” Pea tali fakafiafia age ia Alexis, “Papa, ʼe lelei ke ke fai te meʼa ʼaia.”

Maʼa te kiʼi tamasiʼi ʼaia, neʼe maʼuhiga ke ʼalutahi tona maʼuli mo te meʼa ʼaē kua mālama kiai ʼo ʼuhiga mo Sehova. Mai te ʼaluʼaga ʼaē neʼe ʼapi tahi mo tona ʼu tēhina mataʼi tama e toko lua, neʼe faikole kia Sehova pea neʼe palalau age leva kia nāua ʼo ʼuhiga mo te meʼa ʼaē neʼe ina akoʼi mo tanā ʼu mātuʼa ʼi te tohi Te Tohi ʼo Te ʼu Hisitolia Faka Tohi-Tapu. Logola neʼe mole heʼeki poto lautohi ia Alexis, kae neʼe ina ʼiloʼi lelei te meʼa ʼaē neʼe tuʼu ʼi te tohi ʼaki te ʼu paki ʼo te ʼu hisitolia. Neʼe ina ʼui neʼe ina fia ʼaʼahi te hahaʼi ʼi tonatou ʼu ʼapi, ke ina vaevae mo nātou ia te meʼa ʼaē neʼe ina ako ʼo ʼuhiga mo te ʼu fakatuʼutuʼu ʼa te ʼAtua.

ʼI tona fakahagatonu, ko te kau tūpulaga mo nātou kua matutuʼa ʼe nātou lava faka ʼalutahi tonatou maʼuli mo te meʼa ʼaē ʼe fakaʼamu e Sehova, ia “te Maʼoniʼoni” kia nātou, pea mo nātou maʼu te pilivilesio lahi ʼaupito ke nātou fakamoʼoni ʼo ʼuhiga mo ia ʼi te ʼu puleʼaga. (Isaia 43⁠:3; Mateo 21⁠:16) ʼE mahino ia ko te meʼa ʼaia ʼe kau ki te ʼu meʼa lelei ʼaupito ʼaia ke fai e he tahi.