‘Koutou Kumi Pe Ko Ai ʼAē ʼe Tuha Mo Ia’
KO TAMASO neʼe ko he kolo koloaʼia ʼi te ʼuluaki sēkulō ʼo totatou temi. ʼI te tuʼu takai ʼo te ʼu vao ʼakau, neʼe hage ko he koga meʼa moʼo fakatalitali ki te ʼōmai ʼa te hahaʼi mai te ʼu fenua ʼo te potu esite ʼo Tamaso. Mole faʼa fualoa ʼi te ʼosi mate ʼa Sesu Kilisito, neʼe tuʼu te kokelekasio faka Kilisitiano ʼi Tamaso. Ia nātou ʼaē ʼe kau ai, neʼe ʼi ai te kau Sutea neʼe nātou liliu ko te ʼu tisipulo ʼa Sesu lolotoga te Lafeti ʼo te Penikosite ʼi Selusalemi ʼi te taʼu 33 ʼo totatou temi. (Gaue 2:5, 41) Ko ʼihi tisipulo mai Suta neʼe lagi nātou ʼōmai ʼo nonofo ʼi Tamaso ʼi te malaga ʼo te fakataga ʼi te ʼosi taumakaʼi ʼo Setefano.—Gaue 8:1.
Lagi ʼi te lolotoga ʼo te taʼu 34 ʼo totatou temi, neʼe fai te fakatotonu makehe ki te Kilisitiano mai Tamaso, ko Ananiasi. Neʼe ʼui fēnei age e te ʼAliki: “Tuuʼake, alu ki te ala e higoa ko ‘Hagatonu’ pea ke kumi ki te api o Suta he tagata mai Talase e higoa ko Saulo; he lolotoga faikole na iaʼia.”—Gaue 9:11.
Ko te ala ʼaē ʼe higoa ko Hagatonu neʼe lagi kilometa tahi vaelua tona loa pea neʼe ina tuʼusi te lotomālie ʼo Tamaso. ʼI te paki ʼaenī mai te 19 sēkulō, ʼe feala ai ke tou fakakaukauʼi ki te agaaga ʼo te ala ʼaia ʼi te temi muʼa. ʼUhi ko te faikehe ʼo te agaaga ʼo te ala, neʼe lagi kumi fualoa e Ananiasi ia te ʼapi ʼo Suta. Kae neʼe maʼu e Ananiasi, pea ko tana ʼaʼahi ʼaia neʼe iku ai ki te liliu ʼa Saulo ko te ʼapositolo ko Paulo, ko te tagata faʼafai ʼi te faka mafola ʼo te logo lelei.—Gaue 9:12-19.
Neʼe fekauʼi e Sesu tana kau tisipulo ke nātou ʼolo pea ke nātou ‘kumi ia nātou ʼaē ʼe tuha’ mo te logo lelei. (Mateo 10:11) ʼE mahino mai ia, neʼe kumi moʼoni e Ananiasi ia Saulo. Ohage ko Ananiasi, ʼe kumi fakafiafia e te kau Fakamoʼoni ʼa Sehova ia te hahaʼi ʼe tuha mo te logo lelei pea ʼe nātou fiafia mokā tali e te hahaʼi te logo lelei ʼo te Puleʼaga. ʼE ʼi ai te fua ʼi te faiga mālohi ʼaē ke maʼu ia nātou ʼaē ʼe tuha mo te logo lelei.—1 Kolonito 15:58.
[Paki ʼo te pasina 32]
“Te ala e higoa ko Hagatonu” ia ʼaho nei
[Haʼuʼaga ʼo te paki pasina 32]
From the book La Tierra Santa, Volume II, 1830