Te Faka ʼUhiga ʼo Te Agavaivai ʼa Sehova Kia Tatou
KO TAVITE neʼe ko he tagata neʼe tau mo te ʼu faigataʼaʼia. Neʼe gaohi koviʼi ia ia e te Hau ko Saulo, te tāmai fuaʼa ʼo tona ʼohoana. Neʼe faigaʼi tuʼa tolu e Saulo ke ina hokaʼi ia Tavite ʼaki te tao, pea lolotoga ni taʼu neʼe feholaʼaki ia Tavite, he neʼe fetuliʼaki ia ia e Saulo. (1 Samuele 18:11; 19:10; 26:20) Kae neʼe lagolago ia Sehova kiā Tavite. Neʼe mole ina hāofaki pe ia ia mai iā Saulo, kae neʼe ina toe hāofaki foki mai tona tahi ʼu fili. Koia ʼe tou mahino ai ki te meʼa ʼaē neʼe logoʼi e Tavite ʼi tana hiva fēnei: “Ko Sehova ko toku maka, ko toku kolo tau, pea ko Ia ʼaē ʼe ina faka fealagia ke au hāo. . . . [Sehova] ʼe ke foaki mai anai tau meʼa tali tau ʼo te hāofaki, pea ko tau agavaivai ʼaē ʼe ina fakalahi au.” (2 Samuele 22:2, 36) Neʼe liliu ia Tavite ʼo lahi ʼi Iselaele. Kae koteā koa tona pikipikiga mo te agavaivai ʼa Sehova?
Ka ʼui ʼi te Tohi-Tapu ko Sehova ʼe agavaivai, ʼe mole faka ʼuhiga ʼe ʼi ai tona ʼu tuʼakoi peʼe fakalogo ki niʼihi. Kae ʼe fakahā e te kalitātē taulekaleka ʼaia, ʼe lahi tona lotoʼofa ki te hahaʼi ʼaē ʼe nātou faiga fakamalotoloto ke nātou felogoi lelei mo ia, pea mo loto manavaʼofa kiā nātou. ʼE tou lau fēnei ia Pesalemo 113:6, 7: “[Ko Sehova] ʼe fia mālalo ifo moʼo sioʼi te lagi pea mo te kele, ʼo ina lagaʼi ake mai te efu ia ia ʼaē ʼe veliveli.” Ko tana “fia mālalo ifo” ʼe faka ʼuhiga “ ʼe falele ifo ke sio” peʼe “fakavaivai ifo ke sio.” Koia mai te lagi ko Sehova totonu ‘neʼe falele ifo,’ pe ‘neʼe fakavaivai ifo,’ moʼo leʼoleʼohi ia Tavite, tagata agahala kae neʼe agavaivai pea mo fia tauhi ki te ʼAtua. Koia ʼe fakaloto mālohiʼi fēnei tatou e Tavite: “Logola ko Sehova ʼe māʼoluga, kae ʼe sio ia kiā ia ʼaē ʼe agavaivai.” (Pesalemo 138:6) Ko te manavaʼofa, mo te kātaki fualoa pea mo te lotoʼofa ʼa Sehova kiā Tavite, ʼe tonu ke ina fakaloto mālohiʼi fuli ia nātou ʼaē ʼe nātou fia fai te finegalo ʼo te ʼAtua.
Logola ko Sehova ʼe ko te Tuʼi ʼaē ʼe tauʼaluga pau ʼi te ʼatulaulau, kae ʼe ina tali ke felogoi mo tatou takitokotahi. Koia ʼe tou lava falala ai ʼe tokoni tuʼumaʼu anai kiā tatou māʼia mo te ʼu ʼaluʼaga ʼaē ʼe faigataʼa ʼaupito. ʼAua naʼa tou manatu ʼe ina galoʼi anai tatou. ʼI tana ʼu felogoi mo te kau Iselaele ʼāfea, neʼe tonu te ʼui ʼaē ko Sehova “neʼe ina manatuʼi ia [nātou] lolotoga [tonatou] fakaʼofaʼofa, koteʼuhi ko tana agaʼofa ʼe tuʼu ʼo aʼu ki he ʼu temi ʼe mole ʼiloʼi hona gataʼaga.”—Pesalemo 136:23.
ʼI totatou ʼuhiga kaugana ʼa Sehova ʼi te temi nei, ʼe lagi tou tau mo ni ʼu faigataʼaʼia ohage ko Tavite. ʼE lagi manukiʼi tatou e te hahaʼi ʼaē ʼe mole nātou ʼiloʼi ia te ʼAtua, peʼe lagi tou mahamahaki peʼe tou lotomamahi heʼe kua mate he tahi neʼe tou ʼoʼofa mamahi ai. ʼI he faʼahiga ʼaluʼaga pe ʼe tau mo tatou, kapau ʼe tou fakamalotoloto, pea ʼe feala hatatou fakaōvi kiā Sehova ʼi te faikole, ʼo tou kole ke manavaʼofa mai kiā tatou. Ko Sehova ‘ ʼe falele ifo’ anai moʼo tokaga kiā tatou pea mo fakalogo ki tatatou ʼu faikole. Neʼe tohi fēnei e te tagata fai pesalemo: “Ko te ʼu mata ʼo Sehova ʼe sio ki te kau agatonu, pea ko ʼona taliga ʼe logo ki tanatou pāui ke ina hāofaki ia nātou.” (Pesalemo 34:15) Ei, ʼe mole koa la malave ʼaupito ʼi totatou loto tatatou metitasioʼi te kalitātē maʼuhiga ʼaia ʼo Sehova, ʼaē ko te agavaivai?
[Paki ʼo te pasina 30]
Ohage pe ko te logoʼi e Sehova ia te ʼu faikole ʼa Tavite, pea ʼe toe logoʼi feiā e Sehova tatatou ʼu faikole ia ʼaho nei