‘ ʼE Au Fiafia ʼi Te ʼu Meʼa ʼAē Neʼe Au Ako’
NEʼE punamaʼuli ia te finemui ko Kazuna ʼi te ʼui age ʼaē e tana tagata faiako ke kau ki te sivi ʼo te lea Fakapilitānia. Ko te sivi ʼaia neʼe fakagafua kiai te ʼu kolesi fuli ʼo Hokkaido ʼi te potu noleto ʼo te motu lahi ʼo Saponia, kae ko te hoki fakaʼaogaʼi ʼaia ʼo he tahi ʼi te faleako ʼa Kazuna ke kau ki te sivi ʼaia. Neʼe hoha iā Kazuna ʼi te ʼaho ʼo te sivi, he neʼe ko te kau ako e toko 50 neʼe kau ʼi te sivi ʼaia. Pea neʼe toe lahi age ia tona hoha ʼi tana ʼiloʼi ʼaē ko te ʼu tagata sivi e toko lua ʼe ko tanā lea ia te Fakapilitānia.
Neʼe fakahā ia nātou ʼaē neʼe maʼu pepa, ʼo kamata mai tonatou lau mai te fakapale fakaʼosi ʼo aʼu ki te fakapale ʼuluaki. ʼI te temi leva ʼaē neʼe pāuiʼi ai ia te higoa ʼo Kazuna, neʼe punamaʼuli he neʼe ko ia ʼaē neʼe ina maʼu ia te fakapale ʼuluaki. ʼI te moʼi lakaga ʼaia, ko ia pea mo tana tagata faiako ʼaē neʼe heka pe ʼi ʼona tafa, neʼe nā fesioʼaki pea neʼe nā punamaʼuli toko lua. ʼAki he toe fiafia lahi neʼe ʼalu ai ia Kazuna ki muʼa pea neʼe foaki age ia te fakapale ʼuluaki!
Neʼe fakamatala fakafiafia fēnei e Kazuna: “Neʼe feala ia te faʼahi ʼaia ʼuhi pe ko te Ako ʼo Te Minisitelio Faka Teokalatike ʼaē ʼe fai ʼi te kautahi ʼa Sehova. ʼE au fiafia ʼi te ʼu meʼa ʼaē neʼe au ako ai.” Ko te ako ʼaia ʼaē neʼe kau kiai ia Kazuna talu mai tana kei veliveli, pea ʼe ko he fono ʼe kau ki te ʼu fono ʼa te kau Fakamoʼoni ʼa Sehova. ʼI muʼa ʼo te fai ʼo te sivi, neʼe tokaga ia Kazuna ki te fakaʼaogaʼi ʼo te mikolo, mo akoako ke hā ʼi tana ʼu palalau ʼe agalelei pea mo fiafia, ke ina fakaʼaogaʼi fakalelei ia tona ʼu nima, mo sio ki te nofoʼaki, pea mo te tahi age ʼu ako ʼe maʼu mai te Ako ʼo Te Minisitelio Faka Teokalatike.
Koutou tali ia te fakaafe ʼe fai atu ke koutou ʼōmai ʼo sio ki te ako ʼaia, ʼaē ʼe fai ʼi te vāhaʼa fuli ʼi te ʼu Fale ʼo Te Puleʼaga ʼa te kau Fakamoʼoni ʼa Sehova. ʼE lelei hakotou sio tonu ki tona ʼu fua lelei kia nātou liliki pea mo nātou lalahi. ʼE ko he fono maʼa te hahaʼi fuli. Kapau ʼe koutou fia ʼiloʼi he tahi age ʼu faʼahi ʼo ʼuhiga mo te ako ʼaia, pea koutou fakalavelave ki te kau Fakamoʼoni ʼa Sehova ʼo te kolo ʼaē ʼe koutou nonofo ai.