“Koutou Alaala”
ʼI TE temi muʼa, neʼe ʼi ai te ʼu tagata leʼo matapā ʼo te ʼu hūʼaga ʼo te kolo, mo te ʼu hūʼaga ʼo te fale lotu pea ʼi ʼihi temi mo te ʼu matapā ʼo ʼihi ʼapi. Ko te ʼu tagata ʼaia neʼe mole gata ʼaki pe tanatou pupunu ia te ʼu matapā ʼi te pōʼuli, kae neʼe ko he ʼu tagata neʼe nātou nonofo ʼo leʼoleʼo. Neʼe ko he gāue maʼuhiga, koteʼuhi neʼe fakalogo te maʼuli ʼo te kolo ki te fakatokaga ʼaē neʼe fai e te ʼu tagata ʼaia ki te hahaʼi mokā ʼamanaki hoko he tuʼutāmaki.
Neʼe ʼiloʼi lelei e Sesu Kilisito ia te gāue ʼa te kau tagata leʼo matapā. ʼI te tahi lakaga neʼe ina fakatatau tana kau tisipulo ki he kau tagata leʼo matapā, pea mo ina fakaloto mālohiʼi ia nātou ke nātou nonofo ʼalaʼala ʼo ʼuhiga mo te fakaʼosi ʼo te tuʼu ʼo te ʼu faʼahiga meʼa faka Sutea. Neʼe ina ʼui fēnei: “Koutou tokaga, koutou alaala, koteuhi e mole koutou iloi, pe ko te temi fea. O hage he tagata nee mavae o folau, nee ina tuku tona api, pea . . . nee ina fakatotonu ki te tagata leo matapa ke alaala. Koia, koutou alaala; koteuhi e mole koutou iloi te temi e liliu mai ai te pule o te api.”—Maleko 13:33-35.
Ohage pe ko te nusipepa ʼaenī ko Te Tule Leʼo, kua laka nei te ʼu taʼu e 125, mo tana fakahā ia te fakaloto mālohi ʼa Sesu ke “koutou alaala.” ʼO feafeaʼi? Ohage ko tona fakahā ʼi te pasina 2 ʼo te nusipepa ʼaenī, “ ʼE muliʼi e te nusipepa ʼaenī te ʼu meʼa ʼaē ʼe hoko ʼi te malamanei ʼaē ʼe nātou fakahoko te ʼu lea faka polofeta ʼo te Tohi-Tapu. ʼE ina fakafimālie te loto ʼo te hahaʼi fuli ʼaki te logo lelei ʼaē ko te Puleʼaga ʼo te ʼAtua kua ina vave pulihi ia nātou ʼaē ʼe nātou gaohi koviʼi te hahaʼi pea ʼe ina fakaliliu anai te kele ko he palatiso.” Ko te ʼu Tule Leʼo e 26 000 000 tupu ia lea e 150 ʼe tufa ʼi te malamanei kātoa, pea ʼe ko te nusipepa lotu ʼaia ʼe lahi ʼaupito tona tufa ʼi te malamanei kātoa. ʼE fakaʼaogaʼi e te kau Fakamoʼoni ʼa Sehova, pea ohage ko te kau leʼo matapā ʼo te temi muʼa, ʼe nātou uga te hahaʼi ke nātou “alaala” ʼi te faʼahi fakalaumālie, koteʼuhi ko te Pule, ia Sesu Kilisito, kua vave liliu mai ʼo fakahoko te fakamāu ki te tuʼu ʼo te ʼu faʼahiga meʼa ʼaenī.—Maleko 13:26, 37.