ʼE Moʼoni Koa Te Hisitolia ʼo Te Tohi-Tapu?

ʼI TANĀ tohi Battles of the Bible, ʼe ʼui fēnei e Chaim Herzog, ko te pelesita ʼāfea ʼo te puleʼaga Iselaele, pea mo Mordechai Gichon, polofesea ʼiloa ʼo te alekeolosia ʼi te Univelesitē ʼo Tel Aviv:

“Ko te ʼu fakamatala ʼaē ʼe tuʼu ʼi te Tohi-Tapu ʼo ʼuhiga mo te ʼu puleʼaki tau, ʼe mole feala ke ʼui ʼe ko he ʼu loi. Ohage la, ko te laga tau ʼa Seteone ki te kau Matianite pea mo te ʼu puleʼaga ʼaē neʼe lagolago kiai, ʼaē ʼe fakamatala ia Kau Tuʼi Fakamāu, kapite 6 ki te 8, ʼe feala ke tou fakatatau mo te ʼu tau ʼo te kolo ko Troie, ʼaē ʼe fakamatala e Homère ʼi tana tohi Iliade. Ko te fakamatala ʼa Homère, ʼe talanoa pe ia ki te matātai pea mo he kolo tau ʼe tuʼu ōvi age kiai. ʼE mole tatau ia mo te fakamatala ʼo te laga tau ʼa Seteone. Neʼe mole feala ke hoko ʼi he tahi koga meʼa, ia te ʼu feʼoloʼaki pea mo te ʼu fehōkosi ʼaē ʼe fakamatalatala fakalelei ai ia te ʼu koga meʼa ʼaē neʼe hoko ai te ʼu fetauʼaki ʼaia ʼa te kau lelei pea mo te kau kovi heʼe ko te koga meʼa ʼaē neʼe hoko ai te tau, ʼe ko kilometa ʼe onogofulu . . . Koia ʼe mole feala tatatou fakafisi ki te moʼoni ʼo te fakamatala ʼo te ʼu agaaga ʼo te ʼu tau ʼaē ʼe fakamatala ʼi te Tohi-Tapu.”

ʼE feala hakotou ako te laga tau ʼa Seteone, ʼo koutou fakaʼaogaʼi te mape ʼi te pasina 18 mo te 19 ʼo te kaupepa ‘ Voyez le bon pays.’a Neʼe kamata te fakamatala ʼi te temi ʼaē “neʼe fakatahi kātoa fuli ai ia Matiane mo Amaleke pea mo te hahaʼi ʼo te Potu Esite, pea neʼe nātou fakalaka ʼo nātou nonofo ʼi te malaʼe ʼo Siseleele ʼaē ʼe tuʼu ki lalo.” Neʼe kole e Seteone ki te ʼu telepī ʼaē neʼe ōvi age ke tokoni age ki ai. Neʼe hoko te ʼu meʼa ʼaia mai te vai keli ʼo Halote ʼo aʼu ki te sia ʼo Mole, pea hoko atu ki lalo ifo ʼi te Malaʼe ʼo Solotane. ʼI tanatou ʼosi tuli te ʼu fili, ʼo nātou fakalaka ʼi te Liuʼa ʼo Solotane, neʼe puleʼi ia nātou e Seteone.​—Kau Tuʼi Fakamāu 6:33–8:⁠12.

ʼE fakahā ʼi te mape ʼaia ʼi te kaupepa ‘ Voyez le bon pays ’ ia te ʼu koga meʼa tāfito ʼaē ʼe fakamatala ai. Ko te tahi mape (ʼi te pasina 15) ʼe fakahā ai te ʼu telituale ʼo te ʼu telepī ʼo Iselaele. Ko te ʼu mape ʼaia e lua ʼe lava tokoni atu ke koutou mahino ki te moʼoni ʼo te fakamatala.

ʼE fakamoʼoni ai te palalau neʼe fai e te polofesea neʼe hoki mate pe ko Yohanan Aharoni: “ ʼI te fenua ʼaē ʼe talanoa kiai ia te Tohi-Tapu, ko te agaaga ʼo te fenua pea mo te hisitolia ʼe fepipikiʼaki, koia ʼe mole feala hakita mahino lelei kiai mo kapau ʼe mole fakaʼaogaʼi lua.”

[Kiʼi nota]

[Haʼuʼaga ʼo te paki pasina 32]

Background map: Based on maps copyrighted by Pictorial Archive (Near Eastern History) Est. and Survey of Israel