Koteā ʼAē ʼe Koutou Fakatafito Kiai?

KO TE tuʼu fualoa ʼo he fale ʼe fakalogo ki te mālohi ʼo tona ʼu fakatafito. ʼI ʼihi temi ʼe fakaʼaogaʼi ʼi te Tohi-Tapu ia te pelesepeto ʼaia ohage ko he fakatā.

Ohage la, ko te polofeta ko Isaia ʼe ina ʼui ko Sehova ʼAtua ʼaē “neʼe ina fakatuʼu te fakatafito ʼo te kele.” (Isaia 51:13) Ko te fakatafito ʼaia ʼe ko te ʼu lao ʼa te ʼAtua ʼaē ʼe mole toe fetogi, ʼaē ʼe nātou puleʼi te gaūgaūe ʼa te kele pea mo puke maʼu ʼi tona tuʼuʼaga. (Pesalemo 104:5) ʼE fakahā foki ʼi te Folafola ʼa te ʼAtua, te Tohi-Tapu ia “te ʼu fakatafito” ʼaē ʼe tuʼu ai te sosiete fakatagata. Ko “te ʼu fakatafito” ʼaia ʼe ko te faitotonu, mo te lao pea mo te fakatokatoka. ʼE hoko te ʼu maveuveu ʼi te felogoi ʼa te hahaʼi mokā ʼe “holoʼi,” peʼe fakavaivaiʼi “te ʼu fakatafito” ʼaia e te aga heʼe faitotonu, mo te aga fakahehema, pea mo te agamālohi.​—Pesalemo 11:​2-6; Tāʼaga Lea 29:⁠4.

ʼE toe fakapipiki te pelesepeto ʼaia ki totatou maʼuli takitokotahi. ʼI te fakaʼosi ʼo tana Akonaki ʼiloa ʼi te Moʼuga, neʼe ʼui fēnei e Sesu Kilisito: “Ko te tagata fuape e fakalogo ki aku folafola aeni pea e fai ia ki ai, e hage anai ko he tagata fakapotopoto, e ina fakatuu tona api i te fuga maka. Pea nee to te ua, nee tafe mai te u vaitafe, nee agi mo te u lau matagi o to ki te fale alâ, pea nee mole holo ia, koteuhi nee fakatafito ia ki te maka. Pea ko te tagata fuape e fakalogo ki aku folafola aeni pea e mole fai ia ki ai, e hage anai ko he tagata vale, kua ina fakatuu tona api i te one. Pea nee to te ua, nee tafe mai te u vaitafe, nee agi mo te u lau matagi o pa ki te fale alâ pea nee holo ia, pea nee lahi tona maumau.”​—Mateo 7:​24-27.

Koteā ʼaē ʼe koutou fakatafito kiai tokotou maʼuli? ʼE fakatafito koa ki te one ʼaē ʼe mālū noa, ʼaē ʼe ina fakatātā te filosofia fakatagata ʼaē ʼe mole tui ki te ʼAtua pea ʼe pulinoa anai? Peʼe koutou fakatafito ki te maka mālohi, ʼaē ko te fakalogo ki te ʼu palalau ʼa Sesu Kilisito, ʼaē ka tokoni atu anai ke koutou hāo mai te ʼu gatū ʼo te maʼuli?