“Neʼe Fakatagaʼi ʼUhi Ko Tana Tui”

NEʼE fakatuʼu ʼi te potu noleto ʼo Italia, ʼi te kolo ko Cernobbio, ia te maka fakamanatu ʼi te malaʼe ʼo te kolo moʼo fakamanatuʼi ia nātou ʼaē neʼe gaohi koviʼi ʼuhi ko te mole fakaʼapaʼapa ki te loto faʼitaliha ʼa te tagata. ʼI te ʼu lauʼi ʼukamea ʼaē ʼe tohi ai te ʼu higoa ʼo te ʼu hahaʼi ʼaia, ʼe ʼi ai te lauʼi ʼukamea ʼe tohi ai te higoa ʼo Narciso Riet. Ko Riet neʼe tupu ʼi Siamani kae ko tana ʼu mātuʼa ʼe ko te ʼu Italia, pea neʼe liliu ko te Fakamoʼoni ʼa Sehova ʼi te ʼu taʼu 1930. ʼI te temi pule ʼo Itilele, neʼe fakatagaʼi te kau Fakamoʼoni ʼa Sehova ʼuhi ko tanatou fakafisi ki te hikihiki ʼo Itilele kae fakamālaloʼi ia Sehova, te ʼAtua moʼoni.

Neʼe hola ia Riet ki Cernobbio, he neʼe maʼutokā e te Gestapo tana fakahū fakafūfū ia te ʼu Tule Leʼo ki te ʼu lotoʼā fakamamahi. ʼI ai, neʼe kole age ke ina fakaliliu Te Tule Leʼo ki te faka Italia pea ke ina tufa ki tona ʼu tēhina ʼi te ʼu kolo ʼaē ʼe feōvi mo te kolo ʼaia. Neʼe maʼutokā tana gāue faʼafai ʼaia. Neʼe hūfi te ʼapi ʼo Riet e te ofisie Siamani mo tana kau solia, ʼo nātou puke ia ia, pea mo toʼo tana ʼu Tohi-Tapu e lua pea mo te ʼu tohi ʼaē neʼe ʼui neʼe ko he ʼu meʼa moʼo fakafeagai ki te puleʼaga! Neʼe ʼave ai ia Riet ki Siamani, ʼo pilisoniʼi ʼi te lotoʼā fakamamahi ʼo Dachau, pea neʼe mole fualoa pea matehi ia ia ʼi muʼa ʼo te ʼosi ʼo te Lua Tau Faka Malamanei. ʼE tohi fēnei ʼi te lauʼi ʼukamea ʼaē ʼe ina fakamanatuʼi ia Cernobbio, “Neʼe fakatagaʼi ʼuhi ko tana tui.”

Ko te tui ʼa Narciso Riet mo te tahi ʼu lauʼi teau kau Fakamoʼoni ʼaē neʼe gaohi koviʼi e te kau Nasi, ʼe ko he fakaloto mālohi ki te kau Kilisitiano ʼo te temi nei ke nātou nonofo agatonu kiā Sehova, te Tokotahi pe ʼaia ʼi te ʼatulaulau ʼe tonu ke nātou atolasio ki ai. (Apokalipesi 4:11) Neʼe ʼui fēnei e Sesu: “Fiafia ia nātou ʼaē neʼe fakatagaʼi ʼuhi ko te faitotonu.” ʼE manatuʼi anai e Sehova tanatou ʼu gāue pea mo ina tapuakina anai ia nātou ʼuhi ko tonatou lototoʼa.​—Mateo 5:​10, MN; Hepeleo 6:10.