“Neʼe Feala Pe Honatou ʼĀteaina Atu Aipe”
KO GENEVIÈVE DE GAULLE, ʼilāmutu ʼo te pelesita ʼāfea ʼo Falani ko Charles de Gaulle, neʼe feʼiloʼiʼaki mo te kau Fakamoʼoni ʼa Sehova ʼi te lotoʼā fakamamahi ʼi Ravensbrück ʼi te potu noleto ʼo Siamani. Neʼe ina tohi te ʼu palalau ʼaē ʼe tuʼu ʼi ʼoluga ʼi tana tohi neʼe fai ʼi ʼAukusitō 1945.
Ko te hahaʼi pilisoni ʼaē neʼe nonofo ʼi te lotoʼā fakamamahi ʼi Auschwitz ʼi Polonia, neʼe faka ʼāteaina nātou ʼi te ʼaho 27 ʼo Sānualio 1945. Talu mai te taʼu 1996, kua fai te ʼaho fakamanatu ʼi Siamani ʼo ʼuhiga mo nātou ʼaē neʼe gaohi koviʼi lolotoga te temi pule ʼo Itilele.
Lolotoga te akonaki neʼe fai ʼi te ʼaho fakamanatu ʼaia ʼo te ʼaho 27 ʼo Sānualio 2003, neʼe fakamatala fēnei e te pelesita ʼo Bade-Wurtemberg, ko Peter Straub: “Ko nātou fuli ʼaē neʼe fakatagaʼi ʼuhi ko tonatou lotu peʼe ko tana fai politike pea neʼe nātou tali ke nātou mamate ʼi hanatou fakalogo ki te puleʼaga ʼo Itilele, ʼe tāu mo nātou ke tou fakaʼapaʼapa kiā nātou, pea ʼe mole feʼauga he ʼu palalau moʼo fai ʼaki ia te fakaʼapaʼapa ʼaia. Neʼe gata pe ki te kau Fakamoʼoni ʼa Sehova te fakafisi kātoa ki te muliʼi ʼo te ʼu fakamaʼua ʼa te puleʼaga ʼo Itilele: Neʼe mole nātou fia hiki tonatou nima moʼo fai te ʼalofa kiā Itilele. Neʼe mole nātou fia fai he fakapapau kiā ‘Itilele pea mo te Puleʼaga,’ mo nātou fakafisi ki te hū solia pea mo te gāue fakakinau. Pea ko tanatou tamaliki neʼe mole nātou kau ki te Kautahi ʼa Te Kau Tūpulaga ʼo Itilele.”
Neʼe ʼui fēnei e Sesu Kilisito ki tana ʼu tisipulo: “ ʼE mole nātou kau ʼi te malamanei, ohage pe ko au ʼe mole au kau ʼi te malamanei.” (Soane 17:16, MN ) Koia neʼe kehe tāfito te kau Fakamoʼoni ʼa Sehova ʼuhi ko tonatou lotu. Neʼe hoko atu fēnei e Straub: “Ko te kau Fakamoʼoni ʼa Sehova, ʼaē neʼe tui ki tonatou ʼu kofu te kiʼi moʼi kie huʼa lotuma ʼi te ʼu lotoʼā fakamamahi, neʼe ko te hahaʼi pe ʼaia neʼe feala ke nātou fakagata tonatou fakamamahiʼi. Neʼe tonu pe ke nātou sinie he pepa ʼe nātou fakafisi ai ki tanatou lotu.”
Maʼa te tokolahi ʼo te kau Fakamoʼoni ʼa Sehova, neʼe mole nātou fia fakafisi ki tanatou tui. Koia ko te lagi toko 1 200 ia nātou neʼe mamate lolotoga te temi pule ʼo te kau Nasi. Ko te toko luageau fitugofulu neʼe matehi ʼi tanatou fakafisi ki te hū solia. Neʼe mole ʼui gutu pe tanatou fakafisi, kae neʼe nātou fakahoko te ʼu palalau ʼaenī: “ ʼE tonu ke mātou fakalogo ki te ʼAtua, ohage ko he fakalogo ki he pule, ʼi he fakalogo ia ki te tagata.”—Gaue 5:29, MN.
Ko te kau Fakamoʼoni ʼa Sehova neʼe mole ko he hahaʼi makehe, ohage ko tona fakatokagaʼi e Ulrich Schmidt, te pelesita ʼo te Rhénanie du Nord-Westphalie. ʼI te kaupepa Landtag Intern, ʼe fakaʼaogaʼi ai te ʼu palalau ʼo tana akonaki, ʼaē neʼe ina fakahigoaʼi ai te kau Fakamoʼoni ʼa Sehova, “neʼe ko he hahaʼi ohage ko te hahaʼi fuli, neʼe nātou muliʼi tonatou leʼo ʼo loto, neʼe nātou pipiki maʼu ki tanatou tui, neʼe nātou fakahā tonatou lototoʼa, pea mo nātou fakafeagai ki te ʼu manatu ʼa te kau Nasi ʼaki tanatou ʼu manatu faka Kilisitiano.” ʼE feala ke tou tui papau ko Sehova ʼAtua ʼe fiafia ʼo ʼuhiga mo nātou fuli ʼaē ʼe nātou agatonu pea mo pipiki maʼu kiā te ia māʼia mo te ʼu ʼaluʼaga faigataʼa. Iā Tāʼaga Lea 27:11, ʼe tou lau fēnei ai: “Aga fakapotopoto toku foha pea mo fakafiafia toku loto, ke feala haku tali kia ia ʼaē ʼe manukinuki kia te au.”
[Haʼuʼaga ʼo te paki pasina 30]
Courtesy of United States Holocaust Memorial Museum